Орон нутгийн сонгуулийн үр дүнд Баянгол дүүргийн иргэдийн итгэлийг хүлээж, төлөөлөгчөөр сонгогдсон Э.Магнайбаярыг эргүүлэн татуулахаар хуульчид болон сонгогчдын төлөөлөл нэгджээ. 

Э.Магнайбаяр Баянгол дүүргийн 23 дугаар хороонд МАХН-аас нэр дэвшиж, ялалт байгуулсан юм. Харин үүнийхээ дараа МАН-д элсэж, үнэмлэхээ сүр дуулиантай гардан авсан. Э.Магнайбаяр энэ үйлдлээ "Би БГД-ийнхээ иргэдийн төлөө ийм шийдвэр гаргасан. Учир нь МАН 20, АН 18, ХҮН 2 суудал авсан. МАН нэгэнт аймаг, нийслэлд олон суудалтай байгаа учраас иргэдийнхээ асуудлыг шийдэхийн тулд МАН-даа элсэж байна" хэмээн тайлбарласан юм.

Гэсэн ч үүнд сонгогчид бухимдалтай хандаж, дүүргийн иргэдийн хурлын танхимд цугларч, түүний өөдөөс өндөг, гурил цацаж бухимдлаа илэрхийлээд амжсан билээ. Харин энэ удаа сонгогчид хуульчидтай нэгдэн Баянгол дүүргийн ИТХ Төлөөлөгч Э.Магнайбаярыг эгүүлэн татах асуудлыг хөндөхөөр болсон байна. Энэ талаараа өнөөдөр 11 цагт мэдээлэл хийх аж. 

Б.Баатар