Авто зогсоолын нэгдсэн системийг хэрэгжүүлж эхэлжээ. Эхний удаад Сентрал Тауэрын 51 автомашины зогсоолыг шийдсэн байна. Авто зогсоолын нэгдсэн системийг туршилтаар явуулаад 10 гаруй хонож байгаа ба аравдугаар сарын 28-наас төлбөртэй болгох аж.

Нийслэлийн Иргэдийн төлөөлөгчдийн хурлын 2009 оны арванхоёрдугаар сарын 21-ны,  2011 оны арванхоёрдугаар сарын 9-ны өдрийн хурлаар баталсан үнэ тарифын дагуу авто зогсоолын нэг цагийн төлбөр 1000 төгрөг байх ба ямар нэгэн илүү төлбөр авахгүй.

Дараагийн удаад Хангарьд, Бага тойруугийн гээд нийслэлийн хэмжээнд 575 байршилд 25 мянган автомашины зогсоолыг шийдэхээр төлөвлөжээ. Эдгээр зогсоолд иргэд автомашинаа хоёр цагаас илүү байлгах ёсгүй. Хоёр цагаас хэтрүүлсэн тохиолдолд зогсоолын цагдаа шаардлага тавих ба биелүүлэхгүй  эсэргүүцвэл Зөрчлийн тухай хуулийн дагуу торгууль ногдуулахаар зохицуулжээ.

Авто зогсоолын нэгдсэн системийг бий болгосноор зогсоол хайх хугацаа 65 хувиар буурч, сэлгэлт 70 хувиар нэмэгдэж, зогсоолын талбайн 15 хувь нь байнгын сул байна гэсэн тооцооллыг гаргасан байна. Түүнчлэн иргэд автомашинаа ачуулах нь багасч, мөн зогсоолоос олдог төлбөрийн орлогын 40 хувь нь Авто замын санд, 60 хувь нь  зогсоолын үйлчилгээ эрхэлж буй аж ахуй нэгж, байгууллагад очих аж.

У.Тэргэл