Засгийн газрын өчигдрийн ээлжит бус хуралдаанаар айл өрх болон ААН-ийн цахилгаан, дулаан, усан хангаж, хогны төлбөр зэрэг суурь зардлаас чөлөөлөх шийдвэр гаргасан. Үүнтэй холбогдуулан мэргэжлийн байгууллага болон холбоодын төлөөлөл ямар байр суурь илэрхийлснийг хүргэе.

Тодруулбал, Монголын Барилгачдын холбооны ерөнхийлөгч М.Батбаатар өвлийн улиралд дулаан, цахилгааны төлбөрийг чөлөөлснөөр барилгын салбарт ялангуяа үйлдвэрлэгчдэд томоохон хувь нэмэр, дэмжлэг болж байгаа гэдэгт итгэж байна” гэсэн бол МҮХАҮТ-ын ерөнхийлөгч О.Амартүвшин “Өчигдрийн гаргасан шийдвэр бодитой, хүртээмжтэй шийдвэр боллоо. Хүнд үед бүх нийтийн хамарсан зөв шийдвэр гэж бодож байна” гэлээ.

Харин Монголын жижиглэн худалдаа эрхлэгчдийн холбооны тэргүүн Д.Нарантуяа “Цар тахлын нөхцөл байдлыг даван туулах, бизнес эрхлэгчдээ дэмжсэн таатай мэдээллийг аваад их баяртай байна. Манай холбоонд нийслэлийн 9 дүүрэг болон орон нутгийн 11 мянга гаруй худалдаа эрхлэгчид бий. Өчигдрийн шийдвэр ААН-үүдийн үйл ажиллагаа тодорхой түвшинд сэргэхэд тодорхой хэмжээний хөшүүрэг болно” гэлээ.

Ташрамд дурдахад, Засгийн газрын шийдвэрийн дагуу хөнгөлөлтөд 123800 ААН, 900 мянга гаруй айл өрх хамрагдана.