"Чоно борооноор" гэгчээр үүссэн нөхцөл байдалтай холбогдуулан тогтоосон хөл хорионы үеийг ашиглан улстөрчид Эрүүгийн хуульд өөрсдөдөө зориулсан заалт батлахаар улайрч байна.  

Тодруулбал, хэлэл мэдээллийн хэрэгсэл болон фэйсбүүк, твиттер, блог, инстаграм зэрэг олон нийтийн сүлжээгээр улстөрчидтэй холбоотой худал мэдээлэл тараавал хуулийн хариуцлага хүлээлгэх заалт оруулах гэж байгаа талаар сүүийн өдрүүдэд хэвлэлээр онцолж, эсэргүүцэж буй.

Нэг үгээр бол хуулиар далайлган бүх нийтийн амыг таглах гэсэн санаархал гэж үзэж Хэвлэл мэдээллийн зөвлөлөөс  тууштай эсэргүүцнэ гэдгээ мэдэгдсэн.

Энэ талаар Хууль зүй, дотоод хэргийн сайд Х.Нямбаатар “Хэвлэл мэдээллийн хэрэгслээр болон цахим сүлжээгээр улстөрчийн талаар илт гүтгэсэн, худал мэдээлэл цацсан тохиолдолд хуулийн хариуцлага хүлээлгэнэ. Хэвлэл мэдээллийн хэрэгслийн хувьд Хэвлэл мэдээллийн зөвлөлөөрөө дамжуулан залруулга гаргаж, уучлалт гуйх бөгөөд хэрэв залруулга гаргахгүй гэвэл хуулийн механизм хэрэгжиж эхэлнэ” хэмээн тайлбарласан нь угтаа улстөрчийн талаар ямар нэгэн шүүмжилсэн мэдээлэл явуулахгүй байх, цаашлаад нэг намын дарангуйллын тогтолцоог илэрхийлж буй нэгэн хэлбэр гэж иргэд шүүмжилж байна.

Авлига авсан, албан тушаал эрх мэдлээ урвуулан ашигласан улстөрчийн талаар мэдээлэл цацсан иргэний баримт үнэн байвал яах вэ.

Шалгадаг газар нь шалгаад тогтооно гэж хэлэх байх. Та бүхний гараар хөдөлж гэмгүй иргэдэд ял оноож, идсэн уусан нь чөлөөтэй явна гэж үү.

Бид хаашаа, ямар нийгэм рүү яваад байна аа. Монгол Улс "Эцэг хууль"-даа хүн бүр үзэл бодлоо чөлөөтэй илэрхийлэх, хэвлэн нийтлэх эрхтэй гээд цагаан дээр хараар заачихсан. Энэ суурь үзэл баримтлалаасаа ухарч байгаагийн цаад учиг нь юу вэ, сайд аа. Энэ заалт чинь Үндсэн хуультай зөрчилдөж, Цэцэд очихоор байна.

Б.Лхам