Өнгөрсөн жилийн Улсын баяр наадмын бөхийн барилдааны халаглаж, харамсмаар мөчүүдийн шалтгаан нь хиймэл зүлэг байв. Бороо их орсны улмаас бөхчүүд зүлгэн дээр халтирч унан хөдөлмөр, хичээл зүтгэлээ талаар болгосон. Наад захын жишээ гэвэл, тавын даваанд Улсын заан Б.Пүрэвсайхан Өмнөговь аймгийн харьяат Аймгийн хурц арслан М.Буяндэлгэртэй барилдаж байхдаа хальтарч хүнд бэртсэн.

Учраа бөхөө давсан ч тэр тахим буулгаж давуулсныг Бөхийн комисс үгүйсгэж, Пүрэвсайхан заанд давааг нь өгсөн байдаг. Улмаар Даян аварга Н.Батсуурь түүнийг амлаж даваагаа авсныг наадамчин олон үзсэн. Түүнээс гадна Улсын заан Б.Бат-Өлзий, С.Сүхбат зэрэг түрүү, үзүүрт яригдаж байсан бөхчүүд зүлгэн дээр халтирч унан олны харууслыг төрүүлсэн. 

Дахиж ийм алдаа гаргахгүй байх тал дээр бөхчүүдийн төлөөлөл, иргэд ч олонтаа анхааруулсан. Наадмын дараагаар Улаанбаатар хотын Засаг дарга Х.Нямбаатар "Бороо их орж, халтиргаа үүссэнийг бид харсан. Ирэх жилийн наадмыг үндсэн зүлгэн дээр зохион байгуулах бэлтгэл ажил руу оръё гэдэг шийдэлд хүрсэн" гэх зүйлийг хэлсэн байдаг. Улмаар олон нийт 2025 оны баяр наадмын бөхийн барилдааныг "амьд зүлэг" дээр зохион байгуулна гэсэн бодолтойгоор өнөөдөртэй золгосон. Гэтэл тэр саяхан "Хуучин хиймэл зүлгийг буцааж дэвсэхээр болсон" гэх тэс ондоо зүйлийг ярьжээ. 

Түүнчлэн бөхчүүдээс "уучлалт гуйж" суусан Төв цэнгэлдэх хүрээлэнгийн гүйцэтгэх захирал Ж.Энхжаргалан "амьд зүлэг тарьж амжихгүй учраас өнгөрсөн жил ашигласан хиймэл зүлгээ буцааж дэвсэх" болсноо дуулгав. Угтаа бол тэд өнгөрөгч баяр наадмын дараагаар дахиж ийм алдаа гаргахгүй байх тал дээр санал солилцож, ам өчгөө өгсөн нь баримтаар нотлогдсон. Гэвч яагаад гэнэт үгнээсээ буцаж, олон бөхийн хөдөлмөрийг үнэгүйдүүлсэн асуудалдаа няхуур хандахгүй, төлөвлөгөө гаргахгүй байсаар өдийг хүрэв. Үүний ард хэний ашиг сонирхол нуугдаж байгаа бол?

Жил болгоны наадмаар бороо хур элбэгтэй байдаг. Хиймэл зүлэг борооны усыг шингээхгүй. Ус шингээдэггүй ч бөхчүүдийг хөлс хүчийг шингээсэн энэ зүлгээ дахиад л дэвсвэл өөр ямар бөхчүүдийн хөдөлмөр талаар болох бол гэж түмэн олон халаглаж сууна. 

Л.Баяр