Өнөөдөр 5 дугаар сарын 16-ны өдөр Шинжлэх Ухаан, Технологийн Их Сургуулийн Шинжлэх Ухаан Технологийн Төв Номын сан дээр Монгол Улсын анхны Ерөнхийлөгч Пунсалмаагийн Очирбатын нэрэмжит Уншлагийн танхимын нээлт болов.

Нээлтийн ёслолд Монгол Улсын анхны Ерөнхийлөгч, Төрийн соёрхолт, Чингис хааны Тэргүүн зэргийн одонт бөгөөд Дэлхийн уул, уурхайн академийн тэргүүлэгч гишүүн, Экологийн аюулгүй байдлын олон улсын академийн жинхэнэ гишүүн, Монгол Улсын ШУА-ийн гишүүн, Академич П.Очирбат агсны гэргий Тэргүүн хатагтай Цэвэлмаа, тэдний үр хүүхэд, төрөл төрөгсөд,ШУТИС-ийн Ректор Т.Намнан, Хөдөлмөрийн баатар, профессор Д.Дондов, Геологи, Уул уурхайн сургуулийн захирал доктор К.Хавалболот, Номын сангийн захирал Т.Энхцацрал болон сургуулийн бусад удирдлагууд, эрдэмтэн профессорууд, Монголын геологи, уул уурхайн салбарт хамтран ажиллаж явсан анд нөхөд, шавь нар, мөн ШУА-ийн Ерөнхийлөгч С.Дэмбэрэл, Монгол Улсын ГХЯ-ны сайд асан Онц бөгөөд бүрэн эрхт элчин сайд Ц.Гомбосүрэн зэрэг хүндэт зочид хүрэлцэн ирж, халуун дулаан үгээ хэлж, дурсамжаа хуваалцав. 

Тус Уншлагийн танхимд Монгол Улсын анхны Ерөнхийлөгчийн гэргий тэргүүн хатагтай Ш.Цэвэлмааболон түүний үр хүүхдүүд геологи, уул уурхайн мэргэжлийн болон монгол улсын түүх, нийгэм, улс төр, хууль, эрх зүй, эдийн засаг, эрчим хүч зэрэг бусад шинжлэх ухааны салбарын 1200 гаруй сургалт, судалгааны ном товхимол, нэг сэдэвт бүтээлүүд, 170 гаруй эрдэм шинжилгээний сэтгүүлүүдийг ийнхүү хандивласан явдал нь Монгол Улсын шинжлэх ухаан, технологийн хамгийн том их сургууль болох ШУТИС-ийн оюутан залуус, эрдэмтэн судлаачдын судалгаа шннжилгээгээ хийж, бүтээлээ туурвих их үйлсэд оюуны ихээхэн том хөрөнгө оруулалт болж байгаа ажээ.

Мөн нээлтэнд оролцсон хүндэт зочид ШУТИС-ийн Төв байрны гаднах цэцэрлэгт Монгол Улсын анхны Ерөнхийлөгчдөө зориулж дурсгалыг мод тарив.