Монгол Улсын Тэргүүн Шадар сайд, Эдийн засаг, хөгжлийн сайд Ж.Энхбаяр уул уурхайн салбарт үйл ажиллагаа явуулж буй экспортлогч аж ахуйн нэгжүүдийн төлөөллийг хүлээн авч уулзан, дэлхийн болон бүс нутгийн эдийн засгийн нөхцөл байдал, түүнээс үүдэлтэй салбарын тулгамдсан асуудал, цаашид хэрэгжүүлэх бодлого, арга хэмжээний талаар санал солилцлоо.

Уулзалтад төрийн өмчит болон хувийн хэвшлийн “Эрдэнэс Монгол” ХХК, “Эрдэнэс Тавантолгой” ХК, “Эрдэнэс триктикал минералс” ТӨҮГ, “Монголын алт (МАК)” ХХК, “Дарханы төмөрлөгийн үйлдвэр” ТӨХК, “Энержи ресурс” ХХК, “Өсөх зоос” ХХК, “Тавантолгой” ХК зэрэг байгууллагуудын удирдлага, төлөөлөл оролцож, салбарын өнөөгийн нөхцөл байдал, үйл ажиллагаанд тулгарч буй хүндрэл, эрсдэлийн талаар танилцуулга хийж, санал, байр сууриа илэрхийллээ.

Уулзалтын үеэр Тэргүүн Шадар сайд Ж.Энхбаяр Ойрх Дорнодын бүс нутагт үүсээд буй геополитикийн хурцадмал нөхцөл байдал нь дэлхийн зах зээл, тээвэр ложистик, шатахуун болон түүхий эдийн нийлүүлэлтийн сүлжээнд шууд болон дам нөлөө үзүүлж байгааг онцлон тэмдэглэв. Иймд уул уурхайн салбарын хэвийн үйл ажиллагааг хангах, экспортын орлогыг тогтвортой хадгалах нь улсын эдийн засгийн тогтвортой байдалд онцгой ач холбогдолтойг дурдлаа.

Түүнчлэн аж ахуйн нэгжүүдийн үйл ажиллагаанд саад учруулж буй асуудлуудыг шуурхай шийдвэрлэх, төрийн байгууллагуудын уялдаа холбоог сайжруулах, шаардлагатай тохиолдолд бодлогын болон зохицуулалтын арга хэмжээг авч хэрэгжүүлэх замаар хувийн хэвшлийг бодитой дэмжих чиглэлд анхаарч ажиллахаа илэрхийлэв. Үүнд:

• Шатахууны хангамж, үнийн өсөлтөд хариу арга хэмжээ авах,
• Стратегийн ач холбогдол бүхий түүхий эд, материалын нийлүүлэлтийг тасалдуулахгүй байх,
• Экспорт, тээвэр ложистикийн хүндрэл саадыг бууруулах,
• Төр, хувийн хэвшлийн хамтын ажиллагааг эрчимжүүлэх зэрэг чиглэлээр бодит арга хэмжээ авч хэрэгжүүлэх шаардлагатайг онцоллоо.

Аж ахуйн нэгжүүдийн төлөөллүүд Ойрх Дорнодын нөхцөл байдлаас шалтгаалан олон улсын зах зээлд газрын тосны үнэ өсөж, дизель түлшний үнэ нэмэгдэж байгааг онцлон тэмдэглэв. Уул уурхайн салбарын нийт үйл ажиллагааны зардлын 20-30 хувийг шатахууны зардал эзэлдэг тул үнийн энэхүү өсөлт нь үйлдвэрлэлийн өртөгт шууд нөлөө үзүүлж, ашигт ажиллагаа буурах эрсдэлтэйг илэрхийллээ.

Түүнчлэн тэсэлгээний материалын импорт, нийлүүлэлт доголдох магадлал үүсэж байгаа нь олборлолтын хэвийн үйл ажиллагаанд сөргөөр нөлөөлөх, цаашлаад үйлдвэрлэлийн тасалдалд хүргэх эрсдэл байгааг анхааруулсан. Иймд дээрх асуудлуудыг богино хугацаанд шийдвэрлэх, нийлүүлэлтийн тогтвортой байдлыг хангах чиглэлээр төрөөс онцгой анхаарах шаардлагатайг дурдсан юм.

Уулзалтын төгсгөлд талууд үүсээд буй нөхцөл байдлыг даван туулахад төр, хувийн хэвшлийн уялдаа холбоо, хамтын ажиллагаа нэн чухал болохыг санал нэгтэйгээр илэрхийлж, мэдээлэл солилцох, шуурхай хамтран ажиллах механизмыг сайжруулах чиглэлээр хамтарч ажиллахаар боллоо.