Хятадын дунд сургуулийн сурагчдын энэ оны заавал унших номын жагсаалтад 19 дүгээр зууны Английн сонгодог зохиол “Жэйн Эйр” багтсан нь олны анхаарлыг татаж байна. Тус зохиолыг өсвөр насныханд хайр дурлал, харилцаа болон зөв үнэт зүйлсийн талаар ойлголт өгөхөд ашиглахаар болжээ.
Шарлотт Бронтегийн 1847 онд хэвлүүлсэн “Жэйн Эйр” нь өнчин охин Жэйн Эйрийн амьдрал, бэрхшээлийг даван туулж, бие даасан байдлаа хадгалан, чин сэтгэлийн хайр дурлалтай учирч буй тухай өгүүлдэг. Хятадын төрийн хэвлэл “Бээжин Дэйли” сонинд уг зохиол нь өнөөгийн цахим орчинд түгээмэл болсон гадаад төрх, эд хөрөнгөд хэт ач холбогдол өгсөн харилцааны ойлголтын эсрэг тэнцвэр болж чадна гэж тайлбарласан байна.
Тус улсын 14 орчим насны сурагчдад уг зохиолыг уншуулах нь романтик мэдрэмжийг анх мэдэрч эхэлж буй хүүхдүүдэд эрүүл харилцаа, зан чанарын төлөвшлийн талаар ойлголт өгөх ач холбогдолтой гэж үзжээ. Энэ нь Хятадын эрх баригчид сүүлийн үед онлайн роман, богино хэмжээний драмд гардаг мөнгө хөрөнгө, өшөө авалт, хэтрүүлсэн хайр дурлалын дүрслэлд анхаарал хандуулж байгаатай давхцаж байна.
“Жэйн Эйр” Хятадад шинэ зохиол биш. Тус бүтээлийн анхны хятад орчуулга 1925 онд хэвлэгдсэн бөгөөд түүнээс хойш олон удаа орчуулагдаж, жүжиг болон кино хэлбэрээр бүтээл болжээ. Британийн номын сангийн мэдээллээр уг зохиол Хятадад олон арван жилийн турш уншигчдын дунд нэр хүндтэй хэвээр ирсэн байна.
Гэсэн хэдий ч номыг сургалтын хөтөлбөрт оруулсан нь маргаан дагуулж байна. Зарим эцэг эх орчин үеийн өсвөр насныхан XIX зууны нийгмийн нөхцөл, зохиолын нарийн төвөгтэй хайр дурлалыг хэр ойлгох бол гэсэн асуулт тавьжээ. Харин зарим судлаач уг зохиолд колоничлол, эмэгтэйчүүдийн дүрслэлтэй холбоотой асуудал бий тул сурагчид бүтээлийг шүүмжлэлтэй унших шаардлагатай гэж үзсэн байна.
Ийнхүү дэлхийн уран зохиолын сонгодог бүтээлүүдийн нэг “Жэйн Эйр” Хятадын сургуулийн хөтөлбөрт хайр дурлалын тухай төдийгүй өсвөр үеийнхний зан чанар, харилцааны талаарх ойлголтыг төлөвшүүлэх зорилгоор дахин анхаарлын төвд оржээ.
Л.Баяр
