Хэдхэн хоногийн дараа сурагчдын өвлийн амралт эхэлнэ. Арванхоёрдугаар сарын 18-наас эхлэх амралт хоёрдугаар сарын 1–нийг хүртэл үргэлжлэх юм. Халдварыг дотооддоо алдсантай холбоотойгоор ерөнхий боловсролын сургуулийн сурагчид болон оюутнуудыг хуваарьт хугацаанаас нь өмнө амраан, цахимаар хичээлийг нь зааж эхэлсэн билээ. Өмнө нь сурагчдад энэ нь ихээхэн сонирхолтой байв. Харин одоо бол цахим хичээл хүүхдүүдийг залхаах болж, идэвх сонирхлыг нь ихэд бууруулжээ.

Цахим хичээлийг багш нар хурдан заадгаас бичиж, тэмдэглэж амждаггүй, зарим нь хичээлээ ер ойлгодоггүй, асууж лавлах гэхэд тийм боломж байдаггүй зэрэг олон шалтгааны улмаас хүүхдүүд цахим хичээлд улам л дур сонирхолгүй болж байна. Энэ тухай ч тэд нуухгүй байна. Мэдээж, хичээлээ хийхэд нь эцэг, эх нь зөвлөх ч багшийн хэмжээнд хүрэхгүй нь тодорхой. Ялангуяа бага ангийнхан “золионд” байгааг хатуухан боловч хэлье.

Жишээ татъя. Ноднин буюу 2019-2020 онд нэгдүгээр ангид элссэн сурагчид хэдхэн сар хичээллээд хөл хорионд орсон.  Намраас хоёрдугаар ангид элсэн орсон ч удалгүй мөн танхимаар хичээл орохгүйгээр гэрээр хичээлээ цахимаар үзэхээр болсон. Тэд нэг, хоёрдугаар ангидаа хагас хугас сурсан болж, ирэх намар гуравдугаар ангидаа орох болж байна. Гэвч дийлэнх нь уншиж, бичих чадваргүй байгааг багш, эцэг эхчүүд хүлээн зөвшөөрч байна. Энэ бүхэнд багш, сурагч, эцэг, эхчүүдийг буруутгах аргагүй.

Харин БШУЯ-наас зохион байгуулж буй цахим хичээл хэр үр дүнтэй өнгөрөв гэдэгт л анхаарлаа хандуулахыг хүслээ. Даанч сонирхол татахааргүй, камерын өмнө багш нар нь биеэ барьсан, ярьж, хэлж буй нь ойлгомжгүй, тодорхой бус, өмнө багшийнх нь зааснаас тэс зөрүүтэй зүйл зааж байгаа зэргээр хүүхдүүдийг төөрөлдүүлж, хямраах зүйл олон. Эцэг, эхчүүд ч хүүхдүүдээ дагаж хямран осолтгүй л хичээлийг нь хийлгэж, багш нар нь шалгасан болж, хоёр талаасаа л хичээж байгаа ч үр дүн багатай алга.

Цаашид цар тахал хэдийг хүртэл үргэлжлэх билээ. Ирэх хоёрдугаар сарын .... сурагчдын өвлийн амралт дуусна. Харин ЭМЯ-наас ирэх хоёрдугаар сард  цар тахлын хоёр дахь давалгаа эхэлнэ гэдгийг сэрэмжлүүлж эхэлсэн. Тэгвэл сурагчдын хичээл буцаад л цахим руугаа орж болзошгүй байна. Тэр цагт аргацаасан, үр дүнгүй цахим хичээлээ хэрхэн сайжруулах, багш нараа хэрхэн сонгох, сурагчдыг залхаах бус сонирхолтойгоор  хичээлийг нь хэрхэн заахад ихээхэн ач холбогдол өгөх шаардлагатай байна.

Бодлогыг тодорхойлж суугаа  сайд, дэд сайд, холбогдох албатууд нь сурагчдын хичээл амарсан, чих амар суугаа энэ цагтаа л цахим хичээл үр дүнгээ өгч буй эсэхэд хэлэлцүүлэг өрнүүлж, санал асуулга явуулж тандалт судалгааны ажил хийж суумаар байна. 

У.Тэргэл