Дорноговь аймгийн Замын-Үүд суманд коронавирусний халдвар илэрсэнтэй холбоотойгоор БНХАУ-аас орж ирэх ачаа тээвэрлэлт удааширч үүнийг дагаад дийлэнх нэр төрлийн хүнсний бүтээгдэхүүний үнэ огцом өсчээ. Өдөрт барагцаалбал, зургаан автомашин нарийн ногоо, жимс, жимсгэнэ орж ирдэг байсан бол өдгөө 1-2 автомашиныг нэвтрүүлж байгаагаас үнэ нь 4-5 дахин өсчээ.

Монгол гэсэн шошготой урд, хойд хөршөөс оруулж ирдэг хүнсний бүтээгдэхүүний нэр төрлийг ч иргэд нэрлэж байна.

Тухайлбал, олейна, кларина ургамлын тос, ундаа, ус, спирт гээд хамгийн гол нь газар шимийн салат, алтан тариан гурил зэргийг оруулж ирдэг. Баримттай гэдгийг ч иргэд хэлж байна. Үнэнийг хэлж мэдэхгүй ч хүнсний хомсдол үүссэнийг харахад урд, хойд хөршөөс оруулж ирдэг бүтээгдэхүүн олон бололтой. Хамгийн хачирхалтай нь, монголчуудын хэрэглээг хангадаг гэдэг өндөг нүдний гэм болсон нь нэгийг хэлээд байгаа юм. Ямартай ч, цар тахлаар үндэсний нэртэй бараа, бүтээгдэхүүнийг хаана, хэрхэн үйлдвэрлэдэг, хаанаас оруулж ирдгийг мэддэг болж, тарыг нь таних боломж олдож байна.

У.Тэргэл