Нийслэлийн онцгой комиссоос цаг үеийн ээлжит мэдээллээ хийлээ. 

Нийслэлийн Засаг даргын орлогч Ж.Сандагсүрэн "Баянзүрх дүүргийн нэгдсэн эмнэлэгт халдвар илэрч, шинэ голомт гарсан. Энэ нь зөвхөн нэг хэсэг хүмүүс, тус эмнэлэгтэй холбоотой асуудал мэт хандаж болохгүй. Нэгдсэн эмнэлэг халдварын шинэ голомт болсон нь нийслэлийн хэмжээнд хүн бүрт хамаатай асуудал болоод байна. Учир нь тус эмнэлгээр олон хүн үйлчлүүлсэн тул эрсдэл маш их юм. Иймд хүн бүр  сонор сэрэмжээ алдахгүй байхыг анхааруулъя. Онцын шаардлагагүй бол олон хүн цугласан газар зорчихоос татгалзаж, халдвар хамгааллын дэглэмийг мөрдөх хэрэгтэй" гэв. 

НЭМГ-ын дарга Л.Төмөрбаатар "Баянзүрх дүүргийн нэгдсэн эмнэлэгт коронавирусийн халдвар илэрснээс хойш тус голомтод 32 хүнээс коронавирус илрээд байна. Дүүргийн эмнэлэгт халдвар гарсан ч Баянзүрх дүүргийн иргэд эмнэлгийн тусламж үйлчилгээ хаанаас авах вэ гэдэгт санаа зоволтгүй, бид зохицуулалт хийж байна. Дотоодын халдвар гарснаас хойш НОК-оос одоогийн байдлаар давхардсан тоогоор 250 мянган иргэнд коронавирусийн шинжилгээ хийсэн. Үүний дийлэнх нь PCR шинжилгээ байна. Бүх нийтийн бэлэн байдлын зэргийг бууруулж, өндөржүүлсэн бэлэн байдалд шилжсэнээр иргэд хөдөлгөөнд ороод эхэллээ. Халдварын эрсдэл өндөр энэ үед гадуур их явах нь сайн зүйл биш.

Манай улс хөл хөдөлгөөнийг хязгаарласнаар халдварын голомтыг бариад байсан. Баянзүрх дүүргийн эмнэлэгт батлагдсан иргэдийн ойрын хавьтлуудыг шинжилгээнд бүрэн хамруулсан. Дам хавьтал болох 1000 гаруй хүнээс шинжилгээ авч байна. Өнөөдөр, маргаашдаа дам хавьтлуудын шинжилгээ авч дуусна. Иргэд хөдөлгөөнөө багасгаж, аль болох олон хүнтэй газраар явахгүй байх хэрэгтэй. Амны хаалт зүүх, зай барих, гараа ариутгах хэрэгтэй" гэлээ. 

Б.Баатар