Улсын онцгой комиссоос арванхоёрдугаар сард гурван удаагийн тусгай үүргийн нислэг хийж, гадаад орноос 570 орчим иргэнээ авчрах шийдвэр гаргаад байсан. Гэсэн ч дотоодын халдвар нэмэгдэж, тусгаарлах байрны хүрэлцээ зэргээс шалтгаалан арванхоёрдугаар сарын 25-ны өдрийн Сөүл Улаанбаатарын чиглэлийн тусгай үүргийн нислэгийг цуцлахаар болсон нь олон хүнийг баярлуулан гомдоосон үйлдэл болов. Тус нислэгээр 250 орчим иргэн эх орондоо ирэхээр төлөвлөж байсан ч ийнхүү цуцлагдсан юм.
Энэ талаар ГХЯ-ны Консулын хэлтсийн дарга Мөнхтүшиг “Энэ сарын 25-ны өдөр үйлдэгдэхээр төлөвлөгдөж байсан Сөүл Улаанбаатар чиглэлийн тусгай үүргийн нислэгийг цуцлахаар боллоо. Учир нь дотоодын халдвар нэмэгдэж, тусгаарлах байрны хүрэлцээ зэргээс шалтгаалан эл нислэгийг цуцлах шийдвэр гарсаныг иргэд ойлгох хэрэгтэй. Тус нислэгийг нэгдүгээр сард хийхээр төлөвлөж байгаа. Тиймээс тизээ захиалсан иргэд нэгдүгээр сард ирэх боломжтой. Үнэхээр үүнээс өөр арга байгаагүй гэдгийг эх орондоо ирэхээр төлөвлөж байсан иргэд маань ойлгохыг хүсч байна” хэмээн учирласан.
Тус нислэгийг цуцлах болсон шалтгааны нэг нь иргэдийн тусгаарлах байрны асуудал гэх.
Тэгвэл ХӨСҮТ-ийн Тандалт судлалын дарга А.Амбэсэлмаа “Халдварын тоо нэмэгдсээр байгаа энэ үед гаднаас халдвартай иргэдээ зөөвөрлөх нь эрсдлийг нэмэгдүүлж байна. Халдвартай хүмүүсийн тоо хэдий чинээ олон болно тэр хэмжээгээр иргэд, ард нийтийн дунд халдвар тархах эрсдэл нэмэгдэнэ. Иймээс энэ асуудалд цаашид анхаарах хэрэгтэй" гэдгийг мэдээлсэн.
Үнэхээр гадны улсаас иргэдээ татан авах нь эрсдэлтэй байв уу эсвэл тусгаарлах байрны хүрэлцээнээс шалтгаалав уу гэдэг нь олны эргэлзээг төрүүлэх боллоо.
Хэрэв тусгаарлах байрны хүрэлцээнээс болсон бол хувийн хэвшлийнхэний туслалцаа төрд хэрэгтэй болсон нь дээрх үйл явдлаас харагдаж байх шиг. Төр засгийн зүгээс иргэд, аж ахуйн нэгжүүдэд чадлынхаа хэрээр туслаж, дэмжиж буй. “Аяганы хариу өдөртөө” гэдэг.
Тодотговол, 250 хүн хүлээн авах хүчин чадалтай сувилал, зочид буудал Улаанбаатарт нэлээдгүй бий. Тэдгээр газрууд төр засаг, гадны улс орноос эх орондоо ирэхээр “өдрийн бодол шөнийн зүүд” болж байгаа иргэдэд туслаж, тусгаарлах байр түрээслэвэл олон хүний магнай тэнийх бололтой.
Б.Баатар
