Баянзүрх дүүрэгт нөхцөл байдал хүндэрч одоогийн байдлаар халдварын  дөрвөн голомт үүсчээ. Тодруулбал, Баянзүрх дүүргийн нэгдсэн эмнэлэг,  YII хороо Баянцээл төв, XXYI хороо “Энканто таун”-ы 209 дүгээр байрны 2 дугаар орц, XXYI хорооны 97 дугаар байрыг хамгаалалтад авч, дүүргийн эмнэлэг болоод Баянцээл төвд илэрсэн халдварын нэг, хоёрдахь хавьтлыг бүгдийг тогтоосон байна. 

Мөн дүүргийн нэгдсэн эмнэлэгт нөхцөл байдал хүнд байгаа аж.Гэнэт л хөл хорио тогтоосон учраас иргэд хоол хүнсгүй, хүүхдүүд памперсгүй болсон тул дүүргийн Засаг даргын нөөц хөрөнгөөс шаардлагатай зүйлсээр хангажээ. Өнөөдрөөс дүүргийн 19 цэгт 80 мянга гаруй иргэнээс шинжилгээ авч эхэлсэн бөгөөд оршин суугчид ихээхэн хойрго хандаж байгаа аж. Тиймээс Баянзүрх дүүргийн Тамгын газраас хуваарийн дагуу шинжилгээгээ өгөхийг уриаллаа. 

Баянзүрх дүүргийн ЗДТГ-т хөл хорьсон учраас үйлчилгээ авах гэсэн иргэдийг тийш явахгүйгээр онлайн, цахимаар мэдээллээ авахыг зөвлөж байна. Мөн 19001063 дугаарын утсаар мэдээлэл авч болох аж. Баянзүрх дүүргийн Засаг дарга Н.Баярмөнх дүүрэгт нь нөхцөл байдал хүндэрч эхэлсэн тул хэсэгчлэн  хөл хорио тогтоох саналаа нийслэлийн Онцгой комисст хүргүүлсэн ба Улсын онцгой комисс уг асуудлыг хэлэлцэн эцсийн шийдвэрийг Засгийн газар гаргах юм байна.

У.Тэргэл