Нийслэлийн Баянзүрх дүүргийн нэгдсэн эмнэлэг “COVID-19” халдварын хамгийн том голомт болоод байна. Өнөөдрийн байдлаар тус эмнэлгээс голомтлон халдварласан 62 тохиолдлыг илрүүлээд байгаа ба тэдгээрийн нэг, хоёрдугаар хавьтал болох 300 орчим хүнийг олж тогтоохоор холбогдох байгууллагууд цаг наргүй ажиллаж байна. Үүнээс үүдэн нийслэлд хатуу хөл хориог дахин 14 хоногоор тогтоох шийдвэрийг ч Засгийн газраас гаргалаа.

Эмнэлгийн бохир заваан орчинг өвчтөнүүд байнга шүүмжилж ирсэн  

“Энхсаран” сувиллаас анх халдвар дэгдэхэд бухимдсан иргэд буруутай хүмүүст хариуцлага тооцохыг удаа дараа шаардаж ирсэн. Төр, засаг ч тооцно гэдгээ мэдэгдсэн байгаа. Тэгвэл энэ удаад халдварын бүхэл бүтэн голомтыг бий болгосон Баянзүрх дүүргийн нэгдсэн эмнэлгийн удирдлагууд, хяналт тавьж ажиллах үүрэгтэй Нийслэлийн эрүүл мэндийн газын албан тушаалтнуудад хариуцлагын асуудлыг ярих нь цагаа олоогүй байж болно. Гэхдээ дотооддоо цар тахал алдсан энэ үед ариун цэврийн наад захын шаардлагыг огт хангаж  ажиллаагүй, сувилагчид нь нэг бээлийтэйгээр өвчтөнүүдэд тариа хийдэг, эргэлт сул чөлөөтэй, дуртай үедээ орж гардаг, бие засах болон бусад өрөөний ариун цэвэр бохир заваан, чийгшил, ариутгал халдваргүйтгэл муу гээд тус эмнэлгийн өдөр тутмын үйл ажиллагаатай холбоотой гомдол тасрахгүй гарч байсан. Энэ нь ч бодитоор биелж, өнөөдөр хамгийн эрсдэлтэй халдварын голомт боллоо.

Эмнэлгийг эд хөрөнгөтэй нь 970 гаруй сая төгрөгөөр худалдан авчээ

УИХ, Засгийн газрын шийдвэрээр Баянзүрх дүүргийн нэгдсэн эмнэлгийг 1997 онд менежментийн хувьчлалаар хувьчилжээ. Эмнэлэг үйл ажиллагааныхаа зардлын 90 гаруй хувийг эрүүл мэндийн даатгалаас, үлдсэн хувийг өөрийн орлогоор бүрдүүлдэг байна. Төр эмнэлгийг бүх эд хөрөнгөтэй нь 970 гаруй сая төгрөгөөр үнэлсэн ба худалдаж авсан хүн нь Монгол Улсын гавьяат эмч Б.Даш-Яндаг аж. Харин ямар журмаар ажиллах гэрээг Нийслэлийн Эрүүл мэндийн газартай байгуулдаг байна. Эмнэлгийг хувьчилж авснаас хойш доордуулсан уу гэхээс дээрдүүлээгүй байна. Анх шинэ менежмэнтээр ажиллана хэмээж үйлчилгээндээ ихэд анхаарч,  эмч, ажилтнуудынхаа цалинг 20 хувиар нэмэх зэргээр ажиллаж эхэлсэн ч яваандаа эрч нь буурч, өнөөдөр тус эмнэлгээр үйлчлүүлсэн, хэвтэн эмчлүүлсэн өвчтөнүүд ам сайтай байх нь ховор болжээ. Анх тус эмнэлгийг 100 гаруй мянган хүн амд төлөвлөн барьж, байжээ. Гэтэл өнөөдөр хүн ам нь гурав дахин нэмэгдсэн ч дүүрэгт байх ганц том эмнэлэг нь учраас иргэд хандахаас аргагүйд хүрдэг байна.

Эрүүл мэндийн сайд Т.Мөнхсайхан: Хувийн эмнэлэг харьяаллын хүнээ авах уу, үгүй юу гэдэг нь тэдний асуудал

Тус эмнэлэгт өөр дүүргийн харьяаллын өвчтөн хэвтэн эмчлүүлж байсан гэх юм. Энэ нь халдварыг өөр дүүрэг рүү алдах эрсдэл үүсгэх юм биш үү гэсэн хэвлэлийнхны асуултад Эрүүл мэндийн сайд Т.Мөнхсайхан: Хувьчлагдсан хувийн эмнэлэг харьяаллын хүнээ хэвтүүлэх үү, өөр дүүргийн өвчтөнг авах уу гэдэг нь тэдний дотоод асуудал. Дүүргийнхээ харьяаллын өвчтөнөө авсан ч сахиур нь өөр дүүргийнх байж болно. Мэдээж, халдварыг өөр дүүрэг рүү тархаахгүй гэж хэлж чадахгүй ч тэгтлээ өндөр биш хэмээв.

Эмнэлгээс халдвар авсан гэх иргэд хууль, хяналтын байгууллагад хандана

Хамгийн гол нь, эзэн нь юмаа мэднэ. Бид хөндлөнгөөс яаж ч чадахгүй хэмээн сууж болмооргүй байна. Тэд хүний амь нас, эрүүл мэндийг ингэж гаргуунд нь гаргаж боломгүй юм. Эмчлүүлж байгаад эмнэлгээс халдвар авсан тухайгаа олон хүн баримттайгаар ярьж байгаа. Харин тэд эргээд цаг сайхан ирэхэд хууль, хяналтын байгууллагад хандана гэдгээ ч эхнээсээ илэрхийлээд эхэллээ. Төр, засаг ч тус эмнэлгийн удирдлагууд, эмч, ажилтнууд хаана алдаа гаргав. Олон хүний эрүүл мэндийг эрсдэлд оруулж, нийслэлийг бүхлээр нь хорионд оруулсан буруутан хэн гэдгийг тогтоох учиртай. Мөн энэ бүхний хариуг гавьяат эмч Б.Даш-Яндаг танаас монголчууд шаардах эрхтэй билээ.

У.Тэргэл