Төв аймгийн Эрдэнэ сумын нутаг, Хэн хэнтийн тусгай хамгаалалттай газарт харьяалагдах Естийн халуун рашааны орчимд хүмүүс нас барсан тухай дуудлага өчигдрийн 13 цагийн орчимд  аймгийн цагдаагийн хэлтэст иржээ. Дуудлагын дагуу аймгийн цагдаагийн газрын бие бүрэлдэхүүн Естийн рашааны бага чулуут хэмээх газар руу хоёр цаг гаруй явж очжээ. Учир нь, зам нь хад чулуу, бартаа ихтэй учир хүрэхэд хэцүү байсан аж. Харин Зэвсэгт хүчний 303 дугаар ангийн нисдэг тэргийг дайчлан 16.30 цагийн орчимд нийслэлээс цагдаа, эмнэлгийн бүрэлдэхүүн нэмж очжээ.

Цагдаагийн байгууллагад анх дөрвөн хүн амиа алдсан гэх дуудлага өгсөн ч хэргийн газарт таван хүн гаднаа ил харагдах шарх гэмтэлгүй амиа алдсан байдалтай байжээ. Цагдаагийн байгууллагаас эдгээр хүнийг Хан-Уул дүүргийн XI хороонд оршин суудаг О, Э, Б,Э, Н нар болохыг тогтоожээ. Хэргийн газарт очсон албаныхан урьдчилсан байдлаар халуун рашааныг зорьсон залуус  арвуулаа байсан ба тэдний тав нь майханд, тав нь автомашиндаа хоноглосон байна. Харин майханд хоносон залуус газан хийн халаагуур ашиглаж байсан ба хий алдан угаартан амиа алдсан хэмээн үзэж байгаа аж. Энэ талаар Төв аймгийн Онцгой байдлын газрын дарга н.Ганболд “Өчигдөр цагдаа, эмч нарын бүрэлдэхүүн газар дээр нь ажилласан.Эхний байдлын мэдээллээр, арвуулаа явж байсан юм билээ. Сүлжээ муу барьдаг газар болохоор мэдээллийг тэр дор нь авах боломж муу байна. Угаартсан гэж үзэж байгаа. Өнөө өглөөний 08.30 цагт (арванхоёрдугаар сарын 22) зэвсэгт хүчний дахин нэг бүрэлдэхүүн хөөрсөн. Хоёр цаг гаруйн дараа гэхээр 11 цаг дөхүүлээд ирэх байх. Тэр үед нь тодорхой мэдээллийг өгье” гэлээ.

У.Тэргэл