Монгол орон даяар мал тооллогыг жил бүрийн 12 дугаар сард зохион байгуулдаг. Тус тооллого нь тэжээвэр амьтдын өсөлт бууралт, сүргийн бүтцэд гарч буй өөрчлөлт, мал аж ахуйн салбарын үйлдвэрлэлийн бодит хэмжээг тооцож тодорхойлох, зорилготой юм.

Энэ жилийн хувьд мал тооллогын ажил 2020 оны 12 дугаар сарын 17-ны өдөр эхэлсэн бөгөөд хэвийн явагдаж байна гэж албаныхан мэдээллээ.

Тодруулбал, ХХААХҮЯ-ны Мал аж ахуйн бодлогын хэрэгжилтийг зохицуулах газрын дарга Д.Батмөнх хэлэхдээ “Мал тооллогын ажил улс орон даяар эхэлсэн. Коронавирус цар тахлын нөхцөл байдалтай холбоотойгоор эрүүл ахуй, ариутгалын дүрэм журмыг чанд баримталж, мал тооллогыг 2020 онд багтаан зохион байгуулахаар Засгийн газраас шийдвэрлэсэн байгаа.

ХХААХҮЯ болон Үндэсний статистикийн хорооноос мал, амьтны тооллоготой холбоотой заавар зөвлөмжүүдийг орон нутагт хүргүүлсэн байгаа. 2021 оны эхээр мал тооллогын эхний ажлын урьдчилсан дүн гарна” гэсэн юм.