Төв аймгийн Эрдэнэ сумын нутаг, Хан Хэнтийн тусгай хамгаалалттай газарт харьяалагдах Естийн халуун рашааны орчимд  таван залуу амиа алдсан харамсалтай хэрэг энэ сарын 21-ны өдөр гарсан билээ. Арван залуу гурван автомашинтайгаар тус газарт очсон ба тав нь майхандаа, тав нь автомашиндаа хоноглосон байдаг. Харин майхандаа хоносон таван залуу угаартан харамсалтайгаар амиа алдсан юм.  

Аймгийн цагдаагийн газар, Онцгой байдлын алба хаагчид Естийн рашааны Бага чулуут гэдэг газарт эн тэргүүнд очсон. Тухайн газар нь, бартаа саад ихтэй, мөн сүлжээ барьдаггүй учир ихээхэн хүндрэлтэй байжээ. Мөн Зэвсэгт хүчний 303 дугаар ангийн бүрэлдэхүүн, эмнэлгийн байгууллагынхан нисдэг тэргээр хэргийн газарт очиход таван хүн гаднаа ил харагдах гэмтэл, шархгүй амиа алдсан байжээ. Урьдчилсан байдлаар халуун рашааныг зорьсон залуус майханд хоноглохдоо жижиг  зууханд сайжруулсан түлш түлснээс угаартсан гэсэн эхний дүгнэлт гарчээ.

Тэгвэл ийм нөхцөлд ямар шалтгааны улмаас угаартах вэ. Энэ талаар НЗДТГ-ын Байгаль орчин хариуцсан мэрэгжилтэн Д-ээс тодрууллаа.

-Майханд жижиг зууханд сайжруулсан түлш түлэхэд угаартах ямар шалтаг, шалтгаан байж болох вэ?

-Битүү орчинд ялангуяа майханд галлагааг буруу хийвэл угаартах магадлал өндөр. Шалтгаан олон л доо. Майхны битүүмжлэл болоод агаар сэлгэлт  хэр байсан, яндантай байв уу, сайжруулсан түлш түлж чаддаг хүмүүс үү  гээд угаартахад нөлөөлөх хүчин зүйл их. Тухайлбал, модоо дөнгөж асаагаад түлшээ хийгээд унтсан тохиолдолд угаартах магадлалтай. Модоо сайн өрдөж байгаад дээр нь сайжруулсан түлшээ хийн асаадаг. Ялангуяа жижиг зуух гэхээр сайжруулсан түлш түлэх зориулалтын бус аяны зуух байж таарах нь.  Мэдээж яндангүй бол шууд угаартана.

-Жижиг зориулалтын бус зууханд сайжруулсан түлшийг зөв галлабал угаартахгүй байх боломжтой юү?

-Чаддаг хүн нь түлбэл болно. Галлагааны зөв ажиллагаа их чухал. Тэр залуус орон сууцных гэж уншсан. Тиймээс буруу галлагаатай холбоотой болов уу.

-Галлагааг буруу хийсэн тохиолдолд ямар хугацаанд угаартах боломжтой вэ?

-Хэдхэн секундэд ч болно, хэдэн цаг ч болно.