Баянзүрх дүүргийн Онцгой комиссоос цаг үеийн асуудлаар мэдээлэл хийлээ.

Баянзүрх дүүргийн Засаг дарга Н.Баярмөнх "Баянзүрх дүүргийн Замын цагдаагийн албан хаагч коронавирусний халдвар авсан гэх мэдээлэл гарсан нь ташаа. Одоогоор цагдаагийн албан хаагчийн шинжилгээ эерэг гарсан тохиолдол бүртгэгдээгүй. Мөн Баянзүрх дүүргийн харьялалгүй ч тус дүүрэгт амьдардаг иргэд шинжилгээнд хамрагдаж болох талаар иргэд ихээр асууж байна. Хэрэв Баянзүрх дүүрэгт тодорхой хугацаанд амьдарсан бол шинжилгээнд хамрагдах боломжтой. Гэхдээ тухайн амьдарч байсан газрынхаа хаягийг тодорхой мэдээлэх хэрэгтэй.

Цагаан давааны хогийн цэгт коронавирусний халдварын эерэг тохиолдол батлагдсан. Үүнээс болж хог тээвэрлэлтэд хүндрэл гарч байна. Хог тээвэрлэлтийг Сонгинохайрхан дүүргийн хогийн цэг рүү шилжүүлж байна" гэдгийг онцоллоо.   

Баянзүрх дүүргийн Онцгой комиссын дарга, Дэд хурандаа Д.Эрдэнэбат "Дүүргийн хэмжээнд цар тахлын голомт үүссэн учир халдварын сэжигтэй орон сууц, орцуудад цагдаагийн байгууллага 14 хоногийн хамгаалалт, тусгаарлалтын арга хэмжээ авч байна. Тусгаарлагдсан орон сууцны иргэдээс мэргэжлийн байгууллага гурван удаагийн шинжилгээ авч, хариу сөрөг гарвал тусгаарлалтаас гаргана. Иргэд гэрээс гарах боломжгүй учир долоо хоногт хоёр удаа гарч хүнсээ цуглуулах боломж бүрдүүлнэ" гэв.
 

Б.Баатар