Хүн ардынхаа эрүүл энхийн манаанд зогсох тангараг өргөсөн эмч, эмнэлгийн ажилтнууд цар тахлын энэ хүнд цагт л жинхэнэ мөн чанараа таниулж байна.

ХӨСҮТ гэсэн ганц айлд бүхий л ачааллаа үүрүүлчихээд, хэдэн талаас нь хэмлэж суугаа салбарынх нь нөхөд ч бишгүй харагдана. Мэдээж, эрүүл мэндийн салбарын эрдэмтэн, мэргэдийн  “толгой” одоо л хэрэгтэй.

Мөн мэргэжилт нэгтнүүдийнх нь дэмжлэг, тусламж ус, агаар мэт хэрэгтэй цаг. Гэвч өнөөдрийг хүртэл тусалъя, дэмжье гэж санаачилга гаргасан хувийн тодотголтой нэг ч сектор алга. Ухань руу явъя гэж уриалж байснаа өдгөө чимээгүй болсон Ж.Амарсанаа эмчийг эс тооцвол шүү дээ.  

Нийслэлээс орон нутаг руу, орон нутгаас хот руу зорчих олон мянган иргэнээс богино хугацаанд шинжилгээ авах шаардлагатай болж, эмч, сувилагчид эрвийх дэрвийхээрээ ажиллаж, хариуг богино хугацаанд гаргах гэж лаборантууд сөхөрч унатлаа зүтгэсэн.

Гэтэл энэ цагт хувийн оношилгооны төвүүдийн нэг нь ч лабораторио суллаж өгсөнгүй, ядаж л сорьцыг нь шинжилж өгье гэсэнгүй.

Нийслэлд үйл ажиллагаа явуулдаг хувийн тодотголтой оношилгооны  20 гаруй төв бий. Олны мэдэхээс Гялс, Экспресс, LUX MED төв бас Сөүл эмнэлэг, УБ Сонгдо, Гранд мед, Интер мед, Элэгний төвийнхөн гээд хүчин чадал өндөр лабораториудтай өөрийн болон гаднын хөрөнгө оруулалттай эмнэлэг олон.  Хувийнх болохоор төр, засгаас  хүчилж болдоггүй.

Харин тэдэнд ийм сэтгэл даанч алга. Салбараараа байтугай улсаараа нэгдэж, дэлхий нийтийг хамарсан аюулт цар тахлын ард гарахын тулд төр, засгаас эхлээд хүн бүр хичээж буй. Харин хувийнхан л хувиа хичээж, довоо шарлуулж суугаа нь харамсалтай.

У.Тэргэл