Салбарын хэрүүл “Ковид”-ыг дарахгүй, даамжруулна 

Эрүүл мэндийн яам болон ХӨСҮТ-ийн удирлагуудын хооронд маргаан үүсч, халаа сэлгээний тухай асуудал хөндөгдөх болсон талаарх мэдээлэл сүүлийн үед газар аваад байгаа билээ. Тэгвэл ямар шалтгааны улмаас зөрчилдөөн үүссэн, ХӨСҮТ-ийн захирал Д.Нямхүүг АТГ болон Эрүүгийн цагдаагийн газраас шалгаж байгаа гэх мэдээлэл зэрэгт Д.Нямхүү эмч хариулт өгсөн байна. Тэрбээр “АТГ болон Эрүүгийн цагдаагийн газраас намайг шалгаж байгаа зүйл байхгүй. Надад л лав мэдэгдсэн, мэдсэн зүйл алга. Өмнө нь ажлын уялдаа, зохион байгуулалт маш сайн байсан тул дунд нь хийдэл гарч байгаагүй. Бараг цэргийн маягийн зохион байгуулалттай байсан. Одоо бол ажлын эрэмбэ дараалал алдагдаж, зохион байгуулалт эвдэрч, мэдээлэл буруу дамжигдсаар доголдол үүсч байна. Удирдагдах эрэмбэ дараалал алдагдсан. Хамгийн гол нь ХӨСҮТ-ийн бүх өвчтөнгүүдийг тэр дотроо сүрьеэгийн өвтөнүүдийг хүртэл нүүлгэж, ариутгаж, засварлана гэснээс зөрчилдөөн үүссэн. Халдварт өвчнийг аль болох хөдөлгөөнийг хязгаарлаж, хумидаг байтал нүүлгэн шилжүүлж болохгүй. Би энэ шийдвэрийг дэмжээгүй учир үүрэг даалгавар биелүүлээгүй гээд намайг ажлаа өгөөрэй гэсэн. Энд би урваж, аялдан дагалдсан бол миний албан тушаалаас илүү бидний мэргэжлийн байр суурь алдагдана. ХӨСҮТ-ийн хамт олны хувь заяа шүү дээ. Мөн Сэлэнгэ аймаг зэрэг газраас эмч нарыг авч ирж, ХӨСҮТ дээр бэлтгэ гэсэн чиглэлийг яамнаас өгсөн. Харин манай эмч нар “Энэ бол боломжгүй зүйл” гээд дургүйцсэн. Тиймээс сайдын даалгаварыг биелүүлээгүй. Энэ мэт шалтгаанаас болж зөрчилдөөн үүссэн нь үнэн” хэмээсэн байна.

Ямартай ч Эрүүл мэндийн сайд Т.Мөнхсайхан болон ХӨСҮТ-ийн захирал Д.Нямхүү нарын дунд зөрчилдөөн үүссэн нь үнэн болоод шалтгааны учиг эхний байдлаар тайлагдав. Харин үүнд салбарын сайд нь ямар хариулт өгөх бол.

Т.Мөнхсайхан: Хүмүүсийг зөөвөрлөхөд эрсдэл бага гэж үзсэн

Эрүүл мэндийн сайд Т.Мөнхсайхан өнгөрсөн лхагва гарагийн Засгийн газрын хуралдааны үеэр өвчтөнүүдийг нүүлгэн шилжүүлэх нь аюулгүй болохыг онцолсон. Тэрбээр “ХӨСҮТ-д эмчлүүлж байгаа хүмүүсийг 14 хоногийн дараа Яармагийн эмнэлэг болон Цэргийн төв эмнэлэгт шилжүүлж байна. Шилжүүлсний дараа 7 хоног ажиглан эмчлэх шаардлагатай. ХӨСҮТ-д хүнд болон хүндэвтэр байдалтай 18 хүн байгаа. Хөнгөн хүмүүсийг Яармагийн эмнэлэг рүү шилжүүлж байна. Ерөнхийдөө 14-өөс дээш хонож байгаа хүмүүс халдвар тараах эрсдэл бага болно. Одоо ХӨСҮТ-д байгаа хүнд, хүндэвтэр 18 хүн 14-өөс дээш хоносон. Тиймээс эдгээр хүмүүсийг зөөвөрлөхөд эрсдэл бага гэж үзсэн. 

ХӨСҮТ-д коронавирусний эсрэг эмчилгээ хийж буй тасгийг 100 хувь суллаж, дахин улаан, шар, ногоон бүсээр зохион байгуулж эмч эмнэлгийн ажилчдын орчин нөхцөлийг сайжруулах арга хэмжээ авна. 

Өнгөрсөн 11 сарын хугацаанд коронавирустэй өвчтөнүүдийг эмчилсэн тул нэг удаагийн ариутгал хийж, зохион байгуулалтын орчин, нөхцөлийг сайжруулах шаардлага байна. Орны даац хэтэрсэн, хэт их ачааллын улмаас халдвар авч байна гэж дүгнэж болохгүй. ХӨСҮТ-ийнхэн 11 сарын турш байнгын ажиллаж байгаа тул ядарч, сульдсан тохиолдол байгаа. УОК-оос гарсан ажлын багийн шалгалтаар халдвар хамгааллын дэглэм алдсан байж болзошгүй гэсэн дүгнэлт гаргасан” гэх тайлбарыг өгсөн юм.

Д.Нямхүүд “дохио” өгч, ХӨСҮТ-ийг шалгасан уу

Коронавирусний эсрэг тэмцэж буй ХӨСҮТ-д шалгалт хийсэн, үүнд нь ХӨСҮТ бүдэрсэн нь ч дээрээс шидсэн “чулуу” байсан болох нь Д.Нямхүү эмчийн мэдээллээр баталгаажиж байх шиг.

Угтаа цар тахал газар авч, өдрөөс өдөрт дотоодын халдварын тоо нэмэгдэж байгаа энэ үед эв зүйгээ олоод ажлаа урагшлуулахыг хичээх бус сандал суудлын хэрүүл хийж, хэн хэндээ шилээ харуулаад байх нь зохисгүй үйлдэл. Ер нь салбарын хэрүүл нь “Ковид”-ыг дарах бус даамжруулна гэдгийг ч хэлэх хүн олон байгаа юм.

Б.Баатар