Нийслэлийн утаа өтгөрөөд, хоолой хорсгоод байгаа шалтгааныг сүүлийн өдрүүдэд олон хүн сураглаж, учрыг асууж байна. Албаны хүн энэ талаар, утаан дахь хорт бодис багахан өссөн, мөн салхи тогтуун байгаагаас хэмээн тайлбарлаж байсан билээ. Тэгвэл сайжруулсан шахмал түлшний хэрэгцээ дутмагаас гэр хороолын айл өрх гарт юу тааралдсанаа эсвэл түүхий нүүрсний үлдэгдлээ түлснээс болсон бололтой.

Учир нь, нэг өрхөд нэг долоо хоногт зургаан шуудай сайжруулсан түлш олгодог. Гэтэл хатуу хөл хорионы энэ үед хүн бүр, хүүхэд бүр гэртээ байгаа. Хүүхдүүдээ, настнуудаа дааруулахгүйн тулд өдөржингөө гал түлнэ. Өдөрт нэг удаа хоол хийдэг байсан бол гурав хийхэд сайжруулсан түлшний  хэрэглээ эрс ихсэх нь тодорхой. 

Гэтэл энэ бүхэнд долоо хоногт хэрэглэх зургаан шуудай сайжруулсан түлш хаанаа ч хүрдэггүй.

Мөнгө нь байгаад худалдан авъя гэхээр тогтсон лимиттэй гээд өгдөггүй. Тиймээс айл, өрх зургаан шуудай түлшээ дөрөв хоногт дуусчихлаа гэхэд үлдсэн өдрүүдэд яах вэ.

Мэдээж, идэхийн, дулаан байхын тулд байгаагаа бас түүхий нүүрсээ түлнэ. Гэр хорооллынхныг буруутгах аргагүй юм. Хамгийн гол нь арванхоёрдугаар сарын сүүлчээр хасах 40 хэм хүрч, энэ өвлийн хамгийн хүйтэн өдрүүд тохионо хэмээн Ус цаг уур, орчны шинжилгээний хүрээлэнгээс мэдээлж байгаа.

Харин энэ цагт яах вэ. “Тавантолгой түлш” компанийнхаан, хэдийгээр сайжруулсан түлшний үнийг төр, засгаас 75 хувиар хөнгөлж, иргэдийн амьдралд бодит хөрөнгө оруулалт хийсэн ч хэрэгцээ нь эрэлт үүсгээд эхэллээ. Нэг бол, эрэлтийг нэмэгдүүлэх, үгүй бол түүхий нүүрс, эсвэл байгаагаа түлэх ийм л сонголтыг иргэдэд үлдээлээ.     

У.Тэргэл