Өмнөговь аймгийн Манлай сумын нутаг дэвсгэрт тавьж буй төмөр замын бүтээн байгуулалтад оролцож, өдрийн 69 мянга, нэг сарын 2,070,000 төгрөгийн цалин авах хүн байна уу гэх саналыг ЗХЖШ алба хаагчдадаа тавьжээ. Мэдээж, олон хүн амьдралаа бодон зөвшөөрч, хөдөлмөрийн гэрээ байгуулжээ. Гэтэл өнгөрсөн наймдугаар сараас хойш өдгөөг хүртэл санхүүжилт орж ирээгүй гэсэн шалтгаанаар нэг ч төгрөгийн цалин олгоогүй байна. Үүний улмаас төмөр замын бүтээн байгуулалтад гар бие оролцож буй олон зуун цэргийн алба хаагчдын ар гэрийнхэн хүнд байдалд оржээ.

Цалингаа зүрхэлж асуусан нэгнийг тус бүтээн байгуулалтыг гардан хариуцаж буй бригадын генерал Л.Гансэлэм “Үг дуугүй ажилла, чадахгүй бол эндээс зайл” хэмээн олон хүний нүдэн дээр дарамталсан тул хэн ч зүрхлэн энэ талаар сураглахаа больжээ.

Гэтэл ард нь гэр бүлийнхэн хүнд байдалд байгааг бүгд мэддэг. Харин холбогдох байгууллагууд энэ талаар “Монголын төмөр замаас санхүүжилт орж ирээгүй учраас цалинг хойшлуулсан нь үнэн” гэх тайлбар өгч байна. Мөн салбарынх  нь сайд “Зүүнбаян төмөр зам”-ийн данс руу мөнгө орж ирсэн боловч захиран зарцуулах хүний томилгоог хийгээгүйн улмаас өнөөдөр ийм байдалд хүрээд байна. Хүнээ томилбол Монголын төмөр зам компаниар дамжуулан цэргийн ангиудад цалин хөлсийг нь олгоход бэлэн” гэх юм. Шалтаг тоочих хялбар, гол нь хэдэн зуун алба хаагчдын гэр бүл хатуу  хөл хорионы энэ хүнд хэрхэн амь зууж байгаа бол, генерал аа.

У.Тэргэл