Хавдар судлалын үндэсний төвийн яаралтай тусламжийн эмч, сувилагч хоёроос коронавирусний халдвар илэрсэн учраас өнөөдрөөс үйл ажиллагааг бүхэлд нь зогсоожээ. Баянзүрх дүүргийн эмнэлгээс голомтлон гарсан халдварын улмаас энэ дүүрэгт буй эмнэлгийн ажилтнуудаас шинжилгээ авч, урьдчилан сэргийлэх ажлыг хийж эхэлсэн. Энэ дагуу Хавдар судлалын үндэсний төвийн эмч, ажилтнуудыг шинжилгээнд өчигдөр хамруулахад шөнийн 01 цагийн үед яаралтай тусламжийн эмч, сувилагчийн  шинжилгээ эерэг гарч, 03 цагийн үед PCR шинжилгээгээр батлагджээ. Тиймээс эмнэлгийн бүхэлд нь хаан, 300 гаруй ажилтнаас шинжилгээ авах ажлыг эрчимжүүлжээ. Мөн нэг эмчийн шинжилгээ эргэлзээтэй байгаа тул дахин авч хариуг нь хүлээж байгаа аж.

Хавдар судлалын эмнэлэгт өнөөдөр 204 өвчтөн, 44 сахиур байгаа аж. Тэднийг мөн шинжилгээнд хамруулжээ. Иргэдийн гол асууж байгаа нь, өдрөөр химийн болон туяа эмчилгээ хийлгэж байгаа өвчтөнүүд яах вэ. Харин эмнэлгийн удирдлагын зүгээс ийм өвчтөнүүдийн эмчилгээг тусгай хуваарийн дагуу үргэлжлүүлэн хийгээд явна. Харин гаднаас шинээр хүн хүлээн авахгүй гэдгийг хэлж байна. Мөн төлөвлөгөөт хагалгааг хэвийн хийх ба амралтын хоёр өдөр бүх эмч, ажилтнаа шинжилгээнд хамруулснаар ирэх даваа гарагаас үйл ажиллагаа нь хэвийн болно хэмээн найдаж байгаа аж.

У.Тэргэл