Тагнуулын ерөнхий газраас М.Энхсайханд холбогдох хэрэгт Ерөнхийлөгч асан Ц.Элбэгдоржийг холбогдуулан шалгаж эхэлсэн тухай мэдээлэл гарч эхэллээ. Тодруулбал, Нийслэлийн прокурорын газраас М.Энхсайханыг 2014 онд Тавантолгойн нүүрсний ордод хөрөнгө оруулагчийг сонгох шалгаруулалтыг зохион байгуулах ажлын хэсгийн ахлагчаар ажиллаж байхдаа “Шинхуа Энержи, Энержи ресурс болон Сумитомо  корпорац”-ын түншлэлд эдийн засгийн  давуу байдал бий болгосон  хэргийг Ц.Элбэгдоржийн дэмжлэгтэйгээр үйлдсэн хэмээн үзэж, яллах дүгнэлт үйлдсэн байдаг. Тиймэс эл хэргийг Тагнуулын ерөнхий газраас шалгаж эхэлсэн аж.

Улсын Дээд шүүхийн хяналтын шатны эрүүгийн хэргийн шүүх өнгөрөгч арваннэгдүгээр сарын 11-нд хуралдаж, М.Энхсайханы ялыг дөрвөн жил болгон бууруулсан билээ. Түүнчлэн прокуророос эл хэргийг тусгаарлаж, нэмэлт мөрдөн байцаалтад буцаасан зэрэг нь үүнийг баталж байна хэмээн үзэгсэд олон байна.

Хуулийн байгууллага дуудахад гутлаа тослоод очдог экс Ерөнхийлөгч маань “Улаан бал” ярилцлагад орохдоо  “Би хоёр жилийн дараа шоронд орж болзошгүй” хэмээн ам алдсан удаатай. Мөн улс төрийн хоригдлуудаа сулла хэмээн Ерөнхийлөгч Х.Баттулга руу үг дайж байсан. Энэ бүхнээс харахад  түүнд ямар нэгэн айдас байх шиг.  Энэ нь улс төрийн хоригдол гэгдээд байгаа нөхөдтэй холбоотой гэдэг нь  ч мэдрэгдээд байна.

У.Тэргэл