Автомашины болон явган хүний зам талбай мөстсөнөөс осол аваарын болон бэртэж, гэмтсэн хүний тоо нийслэлд сүүлийн өдрүүдэд эрс ихэсч, замын цагдаагийнхныг түгшээгээд эхэлжээ.

Өчигдөр гэхэд л Боловсролын их сургуулийн уулзварт таван автомашин ташраараа мөргөлдсөн, Багшийн дээдийн уулзварт том оврын автобус замын халтиргааны улмаас шон мөргөөд зогссон ноцтой осол гарсан. Азаар дотор нь цөөн зорчигч байжээ. 

Тээврийн цагдаагийн албанаас Улаанбаатар хотын ерөнхий менежер бөгөөд Захирагчийн ажлын албаны дарга Т.Гантөмөрт хандан нийслэлийн автомашины болон  явган хүний замд давс, бодис цацна уу гэдгийг хүсэлтийг дөрвөн удаа тавьсан ч харамсалтай нь, тэрбээр давс цацахгүй, гамна гэдэг үүрэг өгч, хатуурхжээ. Нийслэлийн хөрөнгийг гамнаж, хэмнэх нь зөв. Гэвч нийслэлчүүдийг мөсөн гулгуур шиг зам, талбайд эрүүл мэнд, амь насаа эрсдэлд оруулан унаж, босч байхад энэ эрсдэлийг давс, бодисоор хэмжлээ гэж үү, ерөнхий менежер ээ.

У.Тэргэл