Засгийн газраас айл өрх, албан байгууллагуудын цахилгаан, дулааны төлбөрийг 2020 оны арванхоёрдугаар сарын 1-нээс тэглэх шийдвэрийг гаргасан. Хэрэглэгчид талархалтай хүлээн авсан ч эхний хүндрэл буюу цохилт нь цахилгааны хэт хэрэглээ байв. Харин хоёрдахь нь иргэд арваннэгдүгээр сарынхаа цахилгаан, дулааныхаа төлбөрийг төлөхгүй хойрго хандаж байгаагаас дулааны цахилгаан станц, нүүрсний уурхай хоорондын өр авлага эрс нэмэгдэж, энэ салбарт өдөр шөнөгүй ажиллаж байгаа ажилтнуудын цалинг тавих боломжгүй болохын зэрэгцээ дээрх газруудын үйл ажиллагаа хэвийн явах боломжгүй нөхцөл байдал үүсчээ.

Хэрэглэгчдийн төлсөн цахилгаан, дулааны төлбөрөөр Улаанбаатар цахилгаан, дулаан түгээх сүлжээ компаниуд, цахилгаан станцууд, нүүрсний уурхай зэрэг байгууллагууд “амьдардаг” ба эдгээрийн хэвийн үйл  ажиллагаа доголдож болзошгүй байгаа аж.

Оны сүүлч гэхэд хэрэглэгчдийн төлбөр төлөлт 80-90 хувьтай байдаг бол энэ удаад дөнгөж 50 хувьтай яваа аж. Засгийн газраас иргэдийнхээ амьжиргааг дэмжих үүднээс цахилгааны төлбөрийг тэглэсэн. Харин айл өрх, албан байгууллага, аж ахуйн нэгжүүд арваннэгдүгээр сарынхаа цахилгаан, дулааны төлбөрөө төлж барагдуулах шаардлагатайг, мөн цар тахлын энэ хүнд цагт иргэний үүргээ биелүүлж, хариуцлагаа ухамсарлахыг уриалж байна.   

У.Тэргэл