Д.Дүүрэн өвөөг хайсаар 20 гаруй хоночихлоо. 83 настай буурай өвлийн дүн хүйтнээр хаагуур хоноглож, юугаар хооллож явааг хэн ч таашгүй нь хэцүү.

Нийслэлд хатуу хөл хорио тогтоон иргэдийн хөл хөдөлгөөн багассан  энэ үед өвөөг олоход боломжтой санагдах юм. Гудамжаар дүүрэн цагдаа, дотоодын цэргийнхан байна. Дээр нь нийслэлийн энд тэндгүй камер суурилуулсан байдаг. Үнэхээр олъё гэвэл олчих цаг хугацаа  хэдийнэ болсон баймаар. Харваас андашгүй, зүүн хөл нь догонцож явдаг, харамсалтай нь ой санаа нь орж гардаг учраас өөрийгөө илэрхийлж чадахгүй  гэдгийг ар гэрийнхэн нь хэлсэн. Үр хүүхэд нь сургийг нь гаргаад алдчихдаг, камерын бичлэгээс харахад цагдаа нарын хажуугаар хэдэн удаа ч өнгөрөв. Гудамжинд алба үүргээ гүйцэтгэж буй цагдаа нарт зургийг нь өгөөд анхааруулчихвал болмоор санагдах юм.

Буурайг олон хоног төөрч явааг өнгөрсөн өдрүүдэд харж, сонсч байсан залуус тэвчилгүй эрэн хайх ажиллагааг сайн дураар эхлүүлэх болсноо зарласан нь өнөөдрийн сайхан мэдээ байлаа. Тэд JEEP автомашины группын залуус бөгөөд нийслэлд хэсэг бүлгээрээ хуваагдан эрж, хайх ажлыг эхлүүлжээ. Нэг хэсэг нь 500 метр доторх бүхий л газруудад хайх ба тухайн байршилд алга гэдгийг бусдадаа дамжуулан мэдээлснээр эрлийн газрыг хумиад явах аж.

Мөн эрлийн ажиллагаанд сайн дураараа  нэгдэхийг ч залууст уриаллаа. Залуусын сайхан сэтгэлийн хүчээр Д.Дүүрэн өвөө маань эрүүл саруул олдоно гэдэгт найдвар тавин, чих тавин хүлээе дээ.

У.Тэргэл