Авлигын эсрэг хуульд өөрчлөлт оруулах тухай хуулийн төсөл болон хамт өргөн мэдүүлсэн “Тогтоолын хавсралтад өөрчлөлт оруулах тухай” УИХ-ын тогтоолын төслийг хэлэлцэн, АТГ-ын дэд даргыг тус газрын дарга нь томилдог байх зохицуулалтыг хийсэн билээ.

Өмнө нь АТГ-ын дарга, дэд даргыг Ерөнхийлөгч санал болгосноор зургаан жилийн хугацаатайгаар УИХ томилдог байсан юм. Энэ нь нэлээдгүй шүүмжлэл дагуулж байв.

Тухайлбал, хэн хэнийг нь УИХ-аас томилдог учраас гүйцэтгэх ажил, мөрдөн байцаалт зэрэг гол чиг үүргээ булаацалддаг, эрх мэдлийн хуваарилалтын зөрчил үүсдэг байсныг энэ удаагийн хуулиар зохицуулалт хийн, захирах, захирагдах ёсыг бий болгохын тулд АТГ-ын дарга нь дэд даргаа томилдог, мөн Ерөнхийлөгч бус Ерөнхий сайд АТГ-ын даргыг санал болгон, УИХ томилдог байхаар хуульчиллаа.
 

Авлигын эсрэг хуульд тус газрын дарга, дэд даргын үүрэг, эрхийг нэгбүрчлэн тодорхой зааж, ялгаж, салгаж  өгөөгүйгээс эрх мэдлийн тэнцвэргүй байдал байнга үүсдэг байв. Ялангуяа дэд дарга нь Засгийн газрын гишүүний дайтай хангамж эдэлж, ажил нь баталгаатай байв. Харин одоо АТГ-ын дарга  нь гар нийлэн ажиллах хүнээ дэд даргаар томилсноор ажил үүргийн хуваарилалт жигдэрнэ хэмээн үзэж байна. Цаашлаад дэд дарга нь төрийн албан тушаалтад хамаардаг учраас Төрийн албаны тухай хуулиар хугацаагүйгээр томилохоор болж байна. 

АТГ-ын дарга З.Дашдаваа, дэд дарга асан Ж.Батсайхан нарыг 2019 оны тавдугаар сарын 2-ний чуулганы нэгдсэн хуралдаанаар томилж байв. Дэд дарга Ж.Батсайханы хувьд АТГ-ыг анх байгуулахад л ажиллаж ирсэн, Б.Дангаасүрэн даргын тушаалаар томилсон дөрвөн даргын нэг юм. Дунд нь өөр албан тушаалд сэлгэн томилж байсан ч энэ газартаа хамгийн удаан ажилласан хүн гэж болно. Харамсалтай нь, тэрбээр хүнд өвчний улмаас таалал төгсч, одоогоор  түүний суудал эзгүй байгаа.

АТГ-ын дэд даргын албан тушаалд төрийн албанд 10-аас доошгүй жил ажилласан,эрх зүйч мэргэжилтэй,  гүйцэтгэх болон мөрдөх ажлын мэдлэг туршлагатай, сүүлийн таван жилд улс төрийн албан тушаал хашиж байгаагүй гэх зарчмыг баримталж, томилно.

Эх сурвалжийн мэдээлж буйгаар, АТГ-ын дарга З.Дашдаваа дэд даргаа дотоодоосоо сонгоно гэдгээ мэдэгдсэн ч Засгийн газрын тэргүүн энэхүү эрх мэдлийг өөртөө авч, өөрийн хүнээ томилуулахаар болсон гэх ч яриа явна. Ямартай ч, АТГ-ын дэд даргыг ойрын хугацаанд томилох зайлшгүй шаардлага үүсээд байгаа ба энэ дагуу “марафон” ч эхэлсэн бололтой.  

У.Тэргэл