Эрүүл ирээд халдвар авчихлаа... Ийн хэлж, гомдоллож буй иргэдийн тоо олширлоо. Гадаадад ажиллаж, амьдарч буй монгол иргэд тусгай үүргийн нислэгт багтахын тулд тухайн улсынхаа эрүүл мэндийн байгууллагад коронавирусний PCR шинжилгээг заавал өгсөн байх ёстой гэсэн шаардлагыг УОК-оос тавьж буй.

Мөн нисэхийн өмнө хурдавчилсан оношлуулаар  дахин шинжилгээ авч байгаа. Гэтэл гаднаас зөөвөрлөгдөн орж ирж байгаа халдварын тоо сүүлийн үед эрс нэмэгдэж байгаа нь эргэлзээ төрүүлж эхлээд байна. Тухайлбал, Франкфуртын нисэх буудалд нэг монгол иргэнээ халдвартайн улмаас үлдээгээд ирсэн гэх дуулиантай тус нислэгээр 160 зорчигч ирсэн юм.

Тэднийг нисэх онгоцны буудлаас ОБЕГ-ын харьяа “Онцгой жаргалант” сувилал, “Амар” зочид буудалд хуваан тусгаарласан. Гэвч өнөөдөр “Амар” зочид буудал халдварын голомтот бүс болоод байна. Эхний удаад хоёр, сүүлдээ зургаа, долоогоороо илэрч,  өнөөдрийн байдлаар  халдвартай хүний тоо 20 гараад байна.

Энэхүү байдлыг  УОК тухайн улсад байхдаа халдвар авч, нууц үедээ байжээ хэмээн тайлбарлаж байгаа бол зорчигчид  эрүүл ирээд тусгаарлалтад байхдаа халдвар авчихлаа хэмээж байгаа. Аль нь зөв, бурууг хэлэхэд эрт ч аль нэг газраа алдаа гараад байгааг энэхүү үйл явц харуулж байна. 

У.Тэргэл