Үндэсний соёл амралтын хүрээлэн гэж үйл ажиллагаа  явдаг эсэх нь тодорхойгүй нэг газар байна. ҮСАХ буюу бидний нэрийдэж заншсанаар, хүүхдийн парк руу сүүлийн үед зүглэх хүүхэд байтугай том хүн ч ховор болсон.

Тоглоомууд нь хуучирч эвдэрснээс хүүхэд унаж гэмтсэн гомдол үе үе гардаг, байнгын газрын маргаантай явж ирсэн энэхүү цэцэрлэгт хүрээлэн өдрөөс өдөрт өнгө зүс нь гундаж, зэвэрсэн төмөр тоглоом л харагдах боллоо. Коронавирусний халдвар тархсантай холбоотойгоор үйл ажиллагаагаа зогсоосон нь  бүр нэрмээс болжээ.

Хүүхэд, багачууд шуугьж байх учиртай энэ газрын даргаар Б.Батнягт гэгч эрхэм ажиллаад удаж буй.

Хүүхдийн парк нийт 35 га газар нутаг дэвсгэрийг хамардаг ч өнөөдрийн байдлаар дөрөвний нэгд нь л үйл ажиллагаа явуулдаг. Тал талаас нь хэмлэсээр 30-хан минут тойрох хэмжээний газартай үлдсэн хэрэг.

Энэ байгууллага сүүлийн хэдэн жилд тоглоомуудаа ер шинэчлээгүй. Эцэг, эхчүүдийн ийм гомдлыг хүлээн авах нь үгүй. Төсөв, мөнгө нь хэцүү байдаг юм болов уу гэтэл харин ч их баян байгууллага ажээ. Саяхан зохион байгуулсан “Хүүхдийн төлөө фонд”-д хандив цуглуулах теле тоглолтын үеэр тус хүрээлэн 300 сая төгрөгийн хандив өгсөн юм. Хүүхдийн паркын удирдлагууд хүүхдийн төлөө фондод хандив өргөх нь зөв харагдана. Харамсалтай нь, энэ мөнгөөрөө хүүхдийн гэх тодотголтой цэцэрлэгт хүрээлэнгийнхээ тоглоомыг шинэчилж, засварлаж, тоноглож яагаад болоогүй юм бэ. Цаг үе нь өнгөрсөн эртний, хэв загвар нь хуучирсан, өнгө нь гандсан тоглоомуудаа сэргээн засварлах, шинэчлэх мөнгө хөрөнгө тэдэнд байсан л юм байна. Харин сэтгэл байгаагүй бололтой.

У.Тэргэл