Дархан-Уул аймаг халдваргүй “Ногоон бүс” болсныг зарлалаа. Тодотговол Дархан-Уул аймгийг ногоон бүс, халдваргүй аймаг болгох зорилготой энэ сарын 2,3-ны өдрүүдэд 12.000 орчим иргэнээс PCR шинжилгээ авахад бүх иргэний шинжилгээний хариу сөрөг гарсан байна. Тиймээс энэ сарын 7-ны өдөр буюу ирэх пүрэв гарагаас эхлэн 17 төрлийн үйлчилгээг хэвийн горимд шилжүүлэн ажиллуулахаар болжээ. 

Тодруулбал, олон улсын байгууллагууд, худалдаа үйлчилгээний байгууллага, зах, худалдааны төвүүд, лангуу алгасахгүй хэвийн ажиллана. Зочид буудал, спорт заал, /ЕБС спорт заал/ фитнес, иог, спининг, теннис, биллиард, бүх төрлийн хүргэлтийн үйлчилгээ, нийтийн хоолны үйлчилгээ, /гуанз, ресторан/, нэг цэгийн үйлчилгээ, саун бассейн, нийтийн халуун ус, гоо сайхан, мэргэжлийн түр сургалтууд, сүлжээний бизнес, сул агууламжтай /18° хүртэлх/ бүтээгдэхүүн худалдахыг зөвшөөрсөн бол баар, караоке, бүх төрлийн үзвэр үйлчилгээ, сүм, хийд, тоглоомын төв, бүжгийн клуб, хурал зөвлөгөөн, тэмцээн, уралдаан, үзэсгэлэн худалдаа явуулахыг хоригложээ.

Харин үйл ажиллагааг нь зөвшөөрсөн газрууд МХГ-аас өгсөн зөвлөмжийн дагуу халдвар хамгааллын дэглэмийг мөрдөж ажиллахыг анхааруулсан. Мөн дээрх байгууллагын ажилтнууд маргааш буюу нэгдүгээр сарын 6-ны өдөр түргэвчилсэн шинжилгээнд хамрагдах ёстой бөгөөд бүх үйлчилгээний байгууллага 18 хүртэлх насны хүүхдэд үйлчлэхгүй байхаар зохицуулалт хийжээ. 

Мөн Дархан, Хонгор, Орхон, Шарын гол сум хоорондын хөдөлгөөнийг нээхээр болсон байна. 

Харин Улаанбаатар хотод мөрдөж буй “Бүх нийтийн бэлэн байдлын зэрэг”-ийг дуустал хугацаа буюу 2021 оны 01 дүгээр сарын 11-ний өдрийг хүртэл Улаанбаатар хотоос Дархан-Уул аймгийнхаа иргэдийг авчрахыг түр хязгаарлав.

Б.Баатар