Дэлхий нийтэд цар тахал дэгдээд жил гаруйн хугацаа, дотоодод халдвар тархаад хоёр сар гаруйн хугацаа өнгөрлөө.

Энэ хугацаанд зургаан аймагт гарсан халдварын голомтыг хумьж чадсан ч нийслэлд эх үүсвэр нь тодорхойгүй голомт бий болсоор байна. Засгийн газрын өнгөрсөн даваа гарагийн хуралдаанаар энэ сарын 11-нээс ААН-үүдийг хэвийн үйл ажиллагаанд оруулахаа мэдэгдсэн ч энэ байдлаар хөл хорио цааш үргэлжилж ч магадгүй нөхцөл байдал үүсээд байна.

"Корона" бидэнд аливаа баярыг хэрхэн цомхон, зардал багатай хийж болдог гэдгийг өнгөрсөн жилийн цагаан сараар харуулсан. Сая он солигдох мөчид ч ялгаагүй мэргэжлийн байгууллагуудын өгсөн зөвлөмжийн дагуу иргэд гэр гэртээ баярлацгаасан.

Гэвч УОК-ын Шуурхай штабынхан иргэдээ хорьчихоод өөрсдөө шинэ жил нууцаар тэмдэглэсэн гэх мэдээлэл цахим сүлжээнд шуугиан дэгдээж эхэллээ. Халдварт өвчин тусахыг хүсэх хэн байхав. Тийм ч учраас иргэд мэргэжлийн байгууллагуудаас өгсөн зөвлөмжийн дагуу л өдийг хүрсэн. Гэтэл алдаа гаргавал иргэд рүүгээ чихчихдэг, тэгсэн мөртлөө өөрсдийнхөө гаргасан журмыг өөрсдөө зөрчөөд байж болох уу, дарга аа. Хүлээх хариуцлага, зохицуулах хуультай улс шүү дээ уг нь.  

А.Сүх