Эрүүл мэндийн яам ээлжит мэдээллээ хийж байна. Энэ үеэр ГХЯ-ны Консулын газрын захирал Л.Мөнхтүшиг олны анхаарал татаад байгаа тусгай нислэгээр иргэдээ татан авч байгаа талаарх мэдээллийг хүргэв.
Тэрбээр "Нэгдүгээр сарын 15-нд БНСУ руу тусгай үүргийн нэг онгоц явуулах шийдвэрийг УОК гаргалаа. Бэлтгэл ажлыг хангаж байна. Энэ нислэгээр 11 сард эх орондоо ирэхээр тийз нь баталгаажаад байсан 150-160 иргэнийг авчирна.
Нутаг буцах 6787 иргэн гадаад байгаагаас 4000 гаруй нь БНСУ-д байгаа. БНСУ-аас ирэх хүсэлтэй иргэд Элчин сайдын яаманд ихээр ирж байгаа нь тус улсад мөрдөгдөж байгаа хөл хорионы дэглэмийг зөрчиж байгаа тул олноороо ЭСЯ дээр очихгүй байхыг зөвлөж байна.
Мөн өчигдөр шөнө ирсэн нэг нислэгтэй холбоотой ташаа мэдээлэлд тодорхой мэдээлэл өгье. Өчигдөр ирсэн нислэг карго нислэг байгаагүй. АНУ-аас Монгол Улсад суугаа ЭСЯ томилолтын хугацаа нь дууссан ажилтнуудаа буцаах, оронд нь ажиллах ажилчдыг авчрах хүсэлтээ удаа дараа тавьж байсан бөгөөд манай үндэсний тээвэрлэгч МИАТ компанийг хөлсөлж тус онгоцоор АНУ-ын ЭСЯ-ны 30, НҮБ-ын хоёр ажилтан, манай улсын таван иргэн ирсэн нь үнэн. Нэг хүн нь тухайн улс руу нэвтрүүлэхийг хориглож, хоёр улсын хил дээр гацаад байсан иргэн байгаа. Нэг нь хүнд өвчтөн хүргэж өгөөд буцаж ирсэн эмч байгаа. Энэ 38 хүнийг Кемпинский зочид буудалд тусгаарласан" гэв.
Б.Баатар
