"Тавантолгой түлш" ХХК-ийн Хяналтын ажилтнууд бага насны гурван хүүхдийн амь насыг аварсан сайхан мэдээ байна. Тодотговол, тус компанийн хяналтын ажилтан Б.Цэндмаа, Т.Оюунцэцэг, Ц.Отгонтунгалаг нар Сонгинохайрхан дүүргийн III хорооны 33 дугаар гудамжинд бүртгэл хийж яваад 2-6 насны гурван хүүхдийн амийг аварсан байна. Тэд  бүртгэл хийж яваад тус айлын хаалгыг тогшиход тайлж өгөлгүй уджээ. Гэтэл дотроос 6-7 насны нэг охин “Эгч ээ, манай хоёр дүүг авраарай” гэж хашгирсан байна. Ингээд хажуу айлын залууг дуудаж,  айлын цонхны торыг эвдүүлж, цонхоор нь гурван хүүхдийг утаан дундаас гарган авчээ.

Том охиноос ээж, аавынх нь дугаарыг авч залгатал тэд  "0” зогсолт хийж магадгүй гэж бодоод хүнс цуглуулахаар явж байна гэжээ. Тэд явахдаа бага насны гурван хүүхдээ гэртээ цоожилчихоод галаа шахмал түлшээр өрдчихөөд явсан байжээ. Зуух, пийшин нь улайсчихсан, зуухан дээр хоолтой байсан гэмээр тогоо түлэгдээд гэрээр дүүрэн утаа болсон байжээ.

Хэрэв хяналтын ажилтнууд тэр айлын хаалгыг тогшиж таараагүй бол, хаалгаа тайлж өгөхгүй байна гээд явчихсан бол гурван хүүхэд угаартах, цаашлаад галд амиа алдах  эрсдэл ойрхон байжээ.

Эцэг, эх нь болсон явдалд цочирдож, гурван хүүхдээ тэврээд уйлаад байсан тухай хяналтын ажилтнууд ярьжээ. Тэд ажил үүргээ гүйцэтгэж яваад бага насны гурван хүүхдийн амийг аварсанд талархаад баршгүй. Харин эцэг, эхчүүдэд энэхүү үйл явдал сургамж болоосой. 

У.Тэргэл