Тээврийн цагдаагийн албанаас автомашины зам нь мөсдөөд, осол аваарын тоо эрс нэмэгдэж, өдөрт 100 гаруй бүртгэгдэж байна. Чимххэн давс, атгахан элс өгөөч хэмээн Хотын ерөнхий менежер Т.Гантөмөрөөс гуйгаад ам руугаа алгадуулсан гэж байгаа. Харин өчигдөр алгаа тэнийлгэсэн бололтой, задгай автомашин дээрээс гурван хүн автомашины замд элс цацаж буй бичлэг цахимд тарж, олны эгдүү, дургүй хоёрыг зэрэг хүргээд амжсан.

Өвлийн дүн хүйтэнд  задгай автомашин дээр хүрзээр бус арван хуруугаа сарвайтал элс цацаж буйг харахад үнэхээр халагламаар санагдаж  байлаа.

Улаанбаатар хотын ерөнхий менежер бөгөөд Захирагчийн ажлын албаны дарга Т.Гантөмөрийг 2016 онд энхүү албан тушаалд томилж байлаа. Түүнээс хойш  таван жил өнгөрчээ.

Ажил нь сайжирдаггүй, асуудлаа шийддэггүй, хэл ам нь гүйцэгддэггүй, хотын дарга солигдох бүрд суудалдаа үлдэж чаддаг ийм нэгэн дарга энэ албан тушаалд “мөнхөрч” байна.

Элс, давсаа цацчих зориулалтын ганц ч төхөөрөмжгүй суугаа Хотын ерөнхий менежер байна гэхэд  дэндүү эмгэнэлтэй бас ичгэвтэр.

Нийслэл төсөвтөө мэдээж мөнгө, хөрөнгийг нь суулгаж өгсөн байж таарна. Харин хэрэгцээт цагт нь, зориулалтын зүйлд нь зарцуулж чаддаггүй, чадамжгүй ийм нэгэн даргын ажлыг хянаж шалгадаг газар байдаггүй юм уу. Дөмөгхөн аваад явчих чадварлаг залуус төрийн албаар дүүрэн байгааг сануулахад илүүц биз дээ!!!

У.Тэргэл