Эрүүл мэндийн яамнаас ээлжит мэдээллээ хийж байна. Эрүүл мэндийн яамны мэргэжлийн салбар зөвлөлийн гишүүн З.Адъяасүрэн "Коронавирусний халдвар хүн амын дунд тэр дундаа эрүүл мэндийн байгууллагад халдварын тохиолдол ихээр бүртгэгдэж, эрсдэл өндөр байгаа учраас зайлшгүй шаардлага гараагүй тохиолдолд эмнэлгээр үйлчлүүлэх, хэвтэн эмчлүүлэхээс зайлсхийхийг анхаарууж байна. Боломж гарвал гэрээр эмчлүүлэх хэрэгтэй. Энэ талаар эмч нар анхаарч ажиллаж байгаа. Бидний судалгаагаар даваа гарагт халдварын эрсдэл өндөр байгаа нь тогтоогдсон. Мөн цайны газруудаар үйлчлүүлэхээс татгалзах хэрэгтэй. Учир нь амны хаалтаа тайлж үйлчлүүлдэг учир эрсдэл өндөр байгаа юм. Түүнчлэн банк, бэлэн мөнгөний машин, зах худалдааны төвүүд ч мөн эрсдэл өндөр гэдгийг ойлгох хэрэгтэй. 

Амны хаалтыг зөв зүүж, тайлах дараалалд суралцах ёстой. Амны хаалтандаа гараараа хүрэх нь маш буруу. Амны хаалт чийгтэй нойтон байвал халдвар авах эрсдлийг нэмэгдүүлэх учир дор бүрт нь сольж байх хэрэгтэй. Эрүүл мэндийн яамнаас дахин дахин сэрэмжлүүлж байгаа заавар зөвлөгөөг баримталж, коронавирусээс өөрөө өөрийгөө хамгаалах боломжтой юм. Хамгийн гол нь амны хаалтаа зүүж, бээлийгээ өмсөж, хүн хоорондын зайгаа баримтлах нь хамгийн гол зарчим.

Түүнчлэн зайлшгүй гэрээс гарсан тохиолдолд гарч орсон цаг хугацаагаа тэмдэглэж, НӨАТ-ын баримтаа хадгалж байхыг зөвлөж байна" гэлээ.

Б.Баатар