Бүх нийтийн бэлэн байдлын зэрэгт шилжсэн энэ цагт гол бүтээн байгуулалт болох Дарханы замыг барих ажил зогсоод байгаа. Энэхүү бүтээн байгуулалт анхнаасаа л нэг барцадтай байгаа. Ажиллах хүчин нэрийдлээр хятад иргэдийг оруулж ирснийг цар тахлын энэ үед халдварын голомттой газраас хятадуудыг авчирлаа хэмээн олон хүн шүүмжилж, ажил гүйцэтгэхээр тендерт шалгарсан компани гэрээгээ цуцалснаас ажил нь зогссон.
Угтаа бол Засгийн газраас ажиллах хүч оруулах асуудлыг шийдэж өгч, БНХАУ-ын таван компани тендерт шалгарсан боловч Шинжаан Уйгарын компани ажлаа хийж чадаагүй учраас гэрээг нь цуцалсан байдаг.
Дарханы замыг Азийн хөгжлийн болон Европын сэргээн босголтын банкны хөнгөлөлттэй зээлээр барьж байгаа. Тиймээс л бүхий л ажлыг тэдний хяналт дор явуулдаг байна. Тухайлбал, одоогийн сонгон шалгаруулалтыг Азийн хөгжлийн банкны дүрэм журмаар явуулах ба тендерийн бүх материалаа бэлдэн шалгуулж, зөвшөөрөл авна. Тэд болж байна гэж зөвшөөрсний дараа л үйл ажиллагаагаа эхлүүлдэг байна.
Харин одоо Зам тээврийн яам замын ажлыг гүйцэтгэх компанийн сонгон шалгаруулалтыг явуулах зөвшөөрөл авахаар ажиллаж байгаа ба гуравдугаар сараас өмнө шалгаруулалтыг хийхээр төлөвлөжээ.
Европын сэргээн босголтын банкны зээлээр хийж байгаа замын ажлыг гэрээгээр бол 2022 оны арваннэгдүгээр сард дуусгах, харин Азийн хөгжлийн банкны зээлээр хэрэгжүүлж буй замын ажлыг 2021 оны дөрөвдүгээр улиралд дуусгахаар төлөвлөжээ.
У.Тэргэл
