ХСҮТ-ийн эмч Э.Эрхэмбаяр нь ходоодны хорт хавдрын хагалгаанд орох гэж буй өвчтөний ар гэрийнхнээс гурван сая төгрөг нэхэмжилсэн гэх мэдээлэл гараад буй. Энэ талаар Эрүүл мэндийн сайд асан Л.Гүндалай байр сууриа илэрхийлжээ.

Тэрбээр “Өвчтөнгөөсөө гурван сая төгрөг нэхсэн бичлэгийг үзээд үнэхээр дуугүй байж чадсангүй. Эмчийн нэхсэн мөнгийг төлж чадаагүй иргэн өнөөдөр өвчин нь хүндэрчихээд байж байна. Үүний хариуцлагыг хэн хүлээх вэ.

Өнөөдөр тэр эмчийг зүгээр донгодоод өнгөрлөө. Энэ нь тэр эмнэлэгт маш том мафи байгааг харуулж байна. Мафийг бий болгосон хүн нь Ж.Чинбүрэн. Тэр хүний үлдээсэн сүлжээ нь ажилласаар байна.

Энэ бүхнийг Ерөнхий сайд өөрчлөх ёстой. Эмч нарын цалинг шүүгч нарын цалинг нэмсэн шиг нэмэх хэрэгтэй. Дэлхий дээр хамгийн өндөр цалинтай мэргэжил нь эмч. Тэдний цалин бага байгаа учраас ийм зүйл гараад байна. Эрх барьж байгаа намын Ерөнхий сайд нь бодлого боловсруулж оруулж ирж байж эрүүл мэндийн салбар хөгжих ёстой. Өнөөдөр энэ салбарыг анхаарч байгаа улс төрийн нам хүчин алга.

Хүний амь нас, эрүүл мэндээс илүү зүйл хаана ч байхгүй. Эрүүл мэндийн салбарыг хөгжүүлэхэд ганц сайдын оролцоо биш бүх улсын бодлого байж хөгждөг юм. Өнөөдөр энэ бүхний эрх мэдэл нь У.Хүрэлсүх, Х.Баттулга нарын гарт байна.

Хөвсгөл аймгаас сонгогдсон Л.Энх-Амгалан,  Л.Мөнхбаатар, Ц.Даваасүрэн нар иргэнээ анхаарсан бол хамгийн түрүүнд оруулаад эмчилүүлчихсэн байсан. Тэд ч үнэндээ утсаа авдаггүй юм билээ. Л.Энх-Амгалан гишүүн их л баян юм гэсэн. Ганц сая төгрөг ч өгчихөж болох л байсан.

Хавдар судлалын төв дээр болсон энэ үйл явдал нь нэг хүнд тохиолдож байгаа зүйл биш нийт монголчуудад тулгарч байгаа бэрхшээл, эрүүл мэндийн салбарт тулгарч байгаа гамшиг.

ХСҮТ-ийн эмч нарт хариуцлага тооцох ёстой. Монгол Улсын Ерөнхий сайд У.Хүрэлсүх эрүүл мэндийн салбарт хөрөнгө оруулах хэрэгтэй. Энэ нь ард түмэнд үлдэх хөрөнгө болно. Ард түмэн л энэ эмнэлгүүдээр үйлчлүүлдэг. Түүнээс эрх мэдэл, албан тушаалтанууд монголд эмчлүүлдэггүй. Тэд Япон, Солонгосыг зорьж эмчлүүлж байна.

Тэмцэхгүй ард түмэн мөхдөг юм. Бид тэмцээгүйгээс л болж өнөөдөр ийм байдал гарч байна” хэмээжээ.

Б.Баатар