Коронавирусний халдвар аваад эдгэрсэн иргэдэд эмнэлзүйн шинж тэмдэг илэрч байгаа гэх мэдээлэл байгаа.

Энэ талаар ЭМЯ-ын ажилтан Д.Нарангэрэл "Дэлхийн улс орнуудад коронавирусний халдвар аваад эдгэрсэн иргэдэд эмнэлзүйн шинж тэмдэг илэрч байгаа гэх мэдээлэл байгаа. БНХАУ-ын Ухань хотод хийсэн судалгаагаар коронавирусний халдвар аваад эдгэрсэн иргэдийн үс унах, ядрах, нойрмоглох, булчин сулрах, зүрх дэлсэх зэрэг шинж тэмдэг зургаан сарын дотор илэрч байна. Гэхдээ энэ нь хүн бүрт илэрч байгаа зүйл биш, харин тухайн хүний нас, өвчлөл хэр хүнд, хөнгөн зэргээс хамаарч өөр өөр байна. Хүнд өвчилсөн, ахмад настануудад ой санамж муудах, мартаж санах зэрэг дээрх хам шинж тэмдэг илүү ажиглагдаж байгаа. Харин 30 наснаас дээш насныханд зүрх судас, бөөр, уушиг зэрэг эрхтэнд архаг хууч байдлаар үлдэх магадлалтай бол эмэгтэйчүүдэд горманы өөрчлөлт гарч үс, хумс хугарах шинж илэрч байна. Гэхдээ эмчийн хяналтад байж эмчлүүлвэл эдгээр нь эдгэрч байна. Харин хэдий хугацаанд эдгээр шинж тэмдэг нь ажиглагдаж байгааг судалж байгаа. Ер нь эрт үедээ илэрвэл эдгэрэх боломж илүү гэдгийг иргэд ойлгож, шинжилгээнд хамрагдах ёстой " гэв.

Б.Баатар