Мутацид орсон шинэ хувилбарыг Норвегийн эрдэмтэд судалсан талаар ЭМЯ-ны ахлах шинжээч Д.Нарангэрэл мэдээллээ. Тэрбээр "Тархвар судлалын хувьд шинэ хувилбар гарсантай холбоотойгоор дэлхий дахинд коронавирусийн халдвар эрчтэй тархаж байна. Шинэ хувилбар нь SARS-CoV-2-оос 70 хувиар илүү тархалттай байгаа юм. Дэлхийн 50 гаруй оронд уг хувилбарын халдвар гарсан. 

Мөн олон хүнийг хамруулсан арга хэмжээг зохион байгуулахад мутацид орсон шинэ хувилбар илүү хурдан тархаж байна. БНСУ-д сүмтэй холбоотойгоор 700 гаруй хүн халдварласан. Энэ нь олон хүний бөөгнөрөл үүсэхэд тархалт өндөр болно гэдгийг баталсан нэг жишээ юм.

Норвегийн эрдэмтэд төдийгүй ДЭМБ-аас 2021 он бол коронавирусийн халдварын тархалт ихтэй, хүнд хэцүү он болохыг анхааруулсан. Дэлхийн улс орнуудад эмнэлгийн орны ачаалал ихэссэн. Их Британид сэхээн амьдруулах, эрчимт эмчилгээний тасгийн 700 гаруй эмч нарын сэтгэл санааны байдлыг судлахад, 50 гаруй хувь нь ямар нэг хэмжээгээр амьдралаас уйдах, өөрийгөө гэмтээх, стресст орсон, ажиллах чадвар буурсан зэрэг стрессийн хам шинжүүд ажиглагдсан байна. Иймд эмч, эмнэлгийн ажилтнуудад сэтгэл санааны дэмжлэг өгөх, цаг наргүй хөдөлмөрийг үнэлэх нь чухал байна гэдгийг анхааруулсан" гэв.

Р.Алтан