Нийслэлийн Засаг даргын захирамжийн хавсралтад өөрчлөлт орсонтой холбоотойгоор НМХГ, Захирагчийн ажлын алба, Нийслэлийн мэдээлэл технологийн газраас хамтран мэдээлэл хийлээ.

"Улсын Онцгой комисс, Нийслэлийн Онцгой комиссын өргөтгөсөн хуралдаан бямба гарагт болсон. Энэ үеэр үйл ажиллагааг нь хязгаарласан зарим чиглэл, салбаруудыг үе шаттайгаар нээх асуудлыг хэлэлцсэн. Энэ хүрээнд нэгдүгээр сарын 18-ны өдрөөс зарим төрлийн барааны худалдаа, үйлчилгээний тодорхой чиглэлүүдийг халдвар хамгааллын дэглэм, шаардлагуудыг мөрдүүлэн ажиллах талаар мэдээлэл хийе.

Нэгдүгээр сарын 18-ны өдрөөс цахилгаан бараа, тавилга, гар утасны төвлөрсөн худалдаа, түргэн үйлчилгээний цэг, цанын баазын үйлчилгээ зэргийг нээхээр боллоо. Мөн иргэдийн агаарт гарах, ууланд алхах зэргээр дархлаа, эрүүл мэндэд чиглэсэн үйлдлийг дэмжих хүрээнд зарим цэгүүд, зогсоолуудын үйл ажиллагааг эргэн хэвийн горимд шилжүүллээ. Нийслэлийн хэмжээнд энэ сарын 11-нээс өндөржүүлсэн бэлэн байдлын зэрэгт шилжиж, 18 салбар чиглэлийн үйл ажиллагаанд нэр дурдан хязгаарлалт тогтоож, бусад бүх төрлийн үйлдвэрлэл, худалдаа, үйлчилгээний үйл ажиллагааг нээсэн. Ийнхүү халдварын тархалтын нөхцөл байдалд хийсэн шинжилгээ, эрсдэлийн үнэлгээ, мэргэжлийн байгууллагуудын саналд үндэслэн үе шаттайгаар нээж байна. Харин дараагийн ээлжинд үлдсэн салбаруудыг нээхээр төлөвлөж байгаа. Гэхдээ хугацааг хэлэх боломжгүй. 

Харин үйл ажиллагааг нь нээсэн байгууллага үйлчлүүлэгчдээрээ заавал QR код уншуулж, хүн хоорондын зайг баримтлах хэрэгтэй бөгөөд амны хаалттай иргэнд л үйлчлэх ёстой" гэв.

Р.Алтан