Коронавирусний халдварыг анх дотооддоо алдсаны голомт нь “Энхсаран” сувилал гэдэг. Тус сувилалд тусгаарлалтад байсан жолоочийг анхны тохиолдол гэж үздэг ч ЭМЯ-ны нэгэн бичлэг сошиалаар задарч, хэсэгтээ л иргэдийг төөрөгдүүлсэн.

Харин саяхан “Энхсаран”-гийн эрүүл ахуй, халдваргүйжүүлэлт муугаас халдвар тархах эрсдэлтэй хэмээн сэрэмжлүүлж, сошиалаар анхааруулж, энэ талаараа хувийнхаа нүүр номд бичсэн иргэн Д.Мөнхбатыг Зөрчлийн тухай хуулийн дагуу 500 мянган төгрөгөөр торгожээ.

Нийгмийг төөрөгдүүлсэн мэдээлэл цацлаа  хэмээн түүнийг торгосон шалтгаанаа цагдаагийн байгууллага тайлбарлажээ.

Тэгвэл коронавирусний халдварын улмаас эмчлүүлээд эдгэрсэн  995 хүн өнөөдрийг хүртэл дуугарахгүй, амаа хамхисны учир энэ бололтой. Хувийн нүүр номдоо мэдээлэл цацсаны төлөө Зөрчлийн хуулиар торгууль ногдуулж байгаа бол ямар эмчилгээ хийсэн, эмнэлгийн болоод эмчилгээний нөхцөл байдал ямар, хаанаас халдвар авч, анх ямар шинж тэмдэг илэрсэн, эдгэрсний дараа биеийн байдал хэвэндээ орсон уу, ямар нэгэн зовиур байна уу гэх олон асуултыг хэвлэлийнхэнд асуухыг, бусдад сэрэмжлүүлэх үүднээс мэдээлэхийг хүсч байгаа. Гэвч 1000 орчим хүнээс өнөөдрийн байдлаар ганц нэг хүн товч мэдээлэл өгснөөс өөрөөр дэлгэрэнгүйгээр, чин сэтгэлээсээ хэлж, ярьсан нь, нийгэмд анхааруулсан нь үгүй. Ямар сайндаа л,  коронавирусний халдвар хэлгүй болгодог юм уу гэсэн үгс тэнэж явах вэ. Хардаж, сэрдэх л асуудал юм.

У.Тэргэл