Төрөөд удаагүй эмэгтэйг нярайн хамт нүцгэн шахам авч гарч хүйтэн автомашинд суулган авч явсан хэрэг нийгмийг бухимдуулаад байгаа. Бүр ХӨСҮТ рүү оруулахдаа эмнэлгийн гаднах шатаар дөрвөн давхар руу өгсүүлсэн байдаг. Тиймдээ ч буруутай хүмүүст өчигдрөөс хариуцлага тооцож эхэлсэн юм. Эрүүл мэндийн сайд Т.Мөнхсайхан НЭМГ-ын болон нэгдүгээр амаржих газрын дарга нарыг албан тушаалаас нь чөлөөлөх хүсэлтийг Хотын даргад илгээн, энэ дагуу болсон билээ.

Харин шилжүүлэн авах гол ажлыг хариуцсан ХӨСҮТ-ийн удирдлагыг чөлөөлсөн, чөлөөлөөгүй гэх зөрүүтэй мэдээлэл яваад байсан юм.

Харин Эрүүл мэндийн сайдын тушаалаар ХӨСҮТ-ийн захирал Д.Нямхүүг  өнөөдөр  ажлаас нь чөлөөллөө.

Тэрбээр 1997 оноос хойш ХӨСҮТ-д ажиллаж байгаа ба энэ хугацаанд гурван удаа ажлаас нь чөлөөлж байжээ. Тэр бүрд шүүхэд үндэслэлгүйгээр ажлаас чөлөөллөө гэх гомдол гаргаж, эргэн албан тушаалдаа очиж байсан билээ. Харин энэ удаагийнх дөрөв дэх нь бөгөөд эмэгтэйг шилжүүлэн авахдаа ноцтой алдаа гаргасан хэмээн хариуцлага тооцсон юм.

У.Тэргэл