"Зүрхний" гэгддэг Б.Болдсайхан эмч өнөө өглөөний МИАТ-ийн нислэгээр БНСУ-ыг зорьжээ. Тэрбээр ходоодны хорт хавдрын хагалгаанд яаралтай орохоор ийнхүү ниссэн байна. Энэ тухайгаа өөрийн цахим хуудастаа ийнхүү бичиж үлдээжээ.

"үүрээр эхэлсэн сүүлийн хагалгаа: ховдолын цоорхой нөхөх сайн боллоо. Одоо онгоцны буудалын зүг ..Уучлаарай .. нэгдүгээр сарын 13-ы шөнө ходоодноос 3л орчим цус алдаж ухаангүй "Сонгдо" эмнэлэгтээ хүргэгдэж, ирж дурангаар цус тогтоолгосон. Явах дөхсөн ... Ходоодны хорт хавдар гэж онош гарсан. Нэгдүгээр сарын 19-нд эмнэлгээсээ гарлаа. Гэхдээ эмнэлэгт байх хоорондоо явах өдрөө хүртэл хойшлуулшгүй хүндэрсэн хүүхдүүдийн хагалгаанд орсон. 

Өнөөдөр эмчилгээнд яваад нэг сар хагас орчим болоод ирэх байх. “Зүрх мартахгүй” төсөл зогсохгүй ээ. Намайг байсан ч, байхгүй ч үргэлжлүүлээд явах 20-иод хүнтэй чадварлаг сайн баг бий. Бямбасүрэн, Доржсүрэн, Буянтөгс, Гэрэлмаа, Зоригоо, Намхайдорж, Эрдэнэбаатар, Хашчулуун эмч нараар ахлуулаад үлдэж, ажлаа хийнэ.

Уучлаарай: 1

МИАТ ачааны карго онгоцонд билетээ аваад нислээ. Битгий бүр их муу хэлж, шүүмжилж, үзэн ядаарай, хэн нэгнийг хойш урагш болгоогүй ээ.

Уучлаарай: 2

Зун, намаржин ходоод өвдсөн ч дурандуулалгүй дараа долоо хоногт гэж өвчтөндөө огт зөвшөөрдөггүй байж өөрөө гаргасан тэнэглэлээс өвчин хожуу мэдэж хүндэрсэнд. Үүний улмаас “Зүрх мартахгүй” төслөөр зүрхний хагалгаанд орж амжих байсан жоохон хүүхдүүдийн өмнө уучлал гуйя.

Хоёр сарын дараа дэлгэр Монгол орондоо яаран яаран ирж уулзахын ерөөл тавья" гэжээ.