Сүүлийн өдрүүдийн улс төрийн халуун сэдэв Оюутолгойтой холбогдож байна. Монгол Улсын Ерөнхийлөгч чуулганы индэр дээрээс Сү.Батболдын бүлэглэл төрийн эргэлт хийлээ хэмээн зарлаж, эрхэм гишүүн хариуд нь Оюутолгойтой холбож, намайг гүтгэлээ. Удахгүй бүхнийг дэлгэнэ хэмээн мэдэгдэв. Удалгүй Монгол Улсын Засгийн газар Нью-Йоркийн шүүхээс Сү.Батболд гишүүнтэй холбоотой  гаргасан нэхэмжлэлээ татлаа. Цаашид Оюутолгой хэрхэхийг харъя гэх улстөрчдийн явуулга, шүүмжлэл өрнөсөөр, С.Ганбаатар гишүүний өлсгөлөн ч нэрмээс болов. 

Донсолгоотой энэ цаг үед жилийн 100 мянган ам.долларын цалин, хангамжтай “Оюутолгой” ХХК-ийн Төлөөлөн удирдах зөвлөлийн гишүүд Монголын талыг төлөөлж  байгаагийнхаа  хэргийг одоо л  гаргах  цаг нь ирлээ. Ялангуяа 2016 оноос хойш тус компанийн ТУЗ-ийн гишүүнээр тасралтгүй ажиллаж ирсэн Ерөнхийлөгч асан Н.Багабандийн хувьд өндөр цалин хангамж, зөөлөн суудалд үлдэхийн тулд ЗГХЭГ-ын даргыг хүртэл дарамталж, улс төрийн тохироо хийснээр санасандаа хүрч байсан.

Харин одоо Оюутолгойн гэрээг цуцлах, шинэчлэх, өөрчлөлт оруулах, хэлэлцээрийн ширээний ард суух зэрэг түвэгтэй олон асуудал ар араасаа гарч байгаа энэ үед улсынхаа эрх ашгийг илүүд үзсэн шийдвэрийг Төлөөлөн удирдах зөвлөл тэр дундаа Ерөнхийлөгч асан Н.Багабанди  оройлон оролцож, зөв шийдвэр гаргуулж чадна гэсэн хүлээлт хэдийнэ үүсчихлээ. Тэгээд ч олон мянган ам. долларын цалин хангамж, зөөлөн сэнтий, нэр хүндээрээ удаан амьдарлаа. Одоо л улс орныхоо эрх ашигт нийцсэн шийдвэрийг гаргуулж чадахгүй бол цаашид ч чадахгүй гэсэн үг.

ТУЗ-ийн шинээр томилсон  залуу гишүүд хэн бэ?

“Оюутолгой”-н ТУЗ-ийн хоёр шинэ гишүүнийг томилох үед чадварлаг, залуу, боловсролтой, боловсон хүчин хэмээн тодотгож, Н.Багабандийн тулах хоёр багана болно хэмээн олзуурхагсад олон байв. Эргэн сануулбал, Монгол Улсын Засгийн газар 2020 оны есдүгээр сарын 14-нд "Оюутолгой" ХХК-ийн Төлөөлөн удирдах зөвлөл /ТУЗ/-ийн гишүүдийн сонгон шалгаруулалтыг нээлттэй зарласан билээ. Сонгон шалгаруулалтад 47 хүн материалаа ирүүлснээс хоёр хүнийг сонгож, Засгийн газрын 2020 оны аравдугаар сарын 28-ны өдрийн хуралдаанаар томилсон байдаг. “Оюутолгой” ХХК-ийн ТУЗ есөн гишүүнтэйгээс зургаа нь хөрөнгө оруулагч тал, гурав нь Монгол Улсын Засгийн газрыг төлөөлдөг юм.

Шинээр томилсон хоёр гишүүний хувьд АНУ-д Morgan Stanley компанид ажилладаг Э.Баясгалан, “Аспайр Майнинг” компанийн гүйцэтгэх захирал З.Ган-Очир нар юм. Э.Баясгалангийн хувьд  АНУ-д амьдарч байхад нь ЗГХЭГ-ын дарга Л.Оюун-Эрдэнэ онлайнаар ярилцлага хийж, ТУЗ-ийн гишүүний шаардлагыг хангаж байгаа эсэхэд нь биечлэн оролцсон гэдэг. Нас залуу ч гадаадад өндөр боловсрол эзэмшсэнээрээ давуу талтай гэдэг.

Нөгөө гишүүн болох З.Ган-Очир Канадын Break Water resources, “Майн Инфо” компанид,  2005-2010 онд "Алтай гоулд" ХХК-ийн захирал, “Аспайр Майнинг” ХХК-ийн гүйцэтгэх захирын албыг  тус тус хашиж байсан, Хонконгт Шинжлэх ухаан, технологийн сургуулийн санхүүгийн мастер хамгаалсан ажээ.

У.Тэргэл