Нийслэлийн Эрүүгийн хэргийн давж  заалдах шатны шүүх УИХ-ын гишүүн асан Б.Болор, Д.Эрдэнэбат нарт холбогдох хэргийг өнгөрсөн долоо хэлэлцээд, ялыг нь хөнгөлж, суллах шийдвэрийг гаргасан билээ. Давж заалдах шатны шүүхийн шийдвэрээр суллагдаж, эрх чөлөөтэй болсон Б.Болор бүгдэд талархал илэрхийлэн, өөрийн нүүр номдоо энэ талаараа бичиж үлдээжээ. Үүнд,

“Өглөөний мэнд. Үнэнд нэг алхам ойртлоо. Шүүхийн эцсийн шийдвэр гартал яллагдсан хилс хэргийн талаар ярихгүй байх нь зөв байх.

Хоригдсон хугацаанд бүхий л талаар дэмжлэг, туслалцаа үзүүлж байсан хайртай хань болон гэр бүл, хэзээ ч надад итгэх найз нөхөд, Архангай аймгийн бүх сумаас ирсэн сэтгэлийн дэм, хамтран нэгэн баг болж,  үр бүтээлтэй ажиллаж байсан Гадаад яам болон Сангийн яамны нөхөд, Монгол-Оросын хамтарсан сургуулийн багш болон шавь нар, АН-ын журмын нөхөд, Хэнтий аймгийн Биндэр, Өвөрхангай аймгийн Хужирт, Хархорин, Ховд аймгийн Булган, Увс аймгийн Бөхмөрөн, Баян-Өлгий аймаг, Өмнөговь аймгийн Ханбогд сумдын хэсэг иргэн, хорих 409 болон 461 дүгээр ангийн ажилтан алба хаагчдад болон бусад надад итгэж, миний төлөө санаа зовж, мөн дэмжиж байсан бүх хүнд талархлаа илэрхийлье” гэжээ.

У.Тэргэл