Улаанбаатар хотод гацсан орон нутгийн иргэдийг татах ажлыг аймгийн онцгой комиссууд зохион байгуулж буй. Тэгвэл орон нутгийг зорьсон иргэдийн шинжилгээний хариу эерэг гарсаар байна.
Тухайлбал, Завхан аймаг Улаанбаатар хотоос татан авсан иргэддээ түргэвчилсэн оношлуураар шинжилгээ хийхэд Улиастай сумын Богдын гол багийн 1 иргэн, Жинст багийн 1 иргэн, Баянтэс суманд 1 иргэний шинжилгээний хариу сул эeрэг гарсан байна. Тиймээс сорьцыг баталгаажуулахаар нийслэл руу явуулжээ. Иймд PCR шинжилгээний хариу гартал буюу 2021 оны 1 дүгээр сарын 27-ны өдрийн 19:00 цагаас 2021 оны 1 дүгээр сарын 28-ны өдрийн 21:00 цаг хүртэл Улиастай, Баянтэс сум руу орох гарах хөдөлгөөнийг хязгаарласан байна. Мөн сум доторх тээврийн хэрэгслийн болон иргэдийн хөдөлгөөнийг түр хязгаарлажээ.
Түүнчлэн Увс аймагт очсон иргэдээс нэг иргэний түргэвчилсэн оношлуурын хариу эерэг гарсан байна. Торуулбал, Улаанбаатар хотоос Увс аймгийн Зүүнхангай, Өндөрхангай сумын чиглэлд өчигдөр нэг автобус ирсэн бөгөөд Зүүнхангай хяналтын пост дээр тухайн зорчигчдоос түргэвчилсэн шинжилгээ авахад нэг зорчигчийн шинжилгээний хариу эерэг гарчээ. Иймд автобусны нийт зорчигчдыг PCR шинжилгээний хариу баталгаажиж гартал тусгаарлах байрны хяналтанд аваад байгаа аж.
Мөн Дархан-Уул аймгийн хүнс тээврийн жолоочоос халдвар илэрсэн байна. Тухайн иргэн энэ сарын 23-ны өдөр шинжилгээ өгөөд 27-ны өдөр аймгийн постоор нэвтрэх үед шинжилгээний хариу эерэг гарсан байна. Тиймээс тухайн иргэнийг мөн Улаанбаатар хотод авч ирэн эмчилгээндд оруулжээ.
Ташрамд өгүүлэхэд, Ховд аймгийг зорьсон иргэдээс мөн хоёр хүний шинжилгээний хариу эерэг гарч улмаар бүх зорчигдийг Улаанбаатар хотод авчраад байгаа билээ.
Б.Баатар
