Боловсрол шинжлэх ухааны сайд Л.Цэдэвсүрэн "Өмчийн хэлбэр харгалзахгүй бүх шатны боловсролын байгууллага суралцагчийн сургалтын төлбөрт хөнгөлөлт үзүүлэх, дараагийн төлбөрт шилжүүлэх түр журам"-ыг батлан гаргасан талаар бид өмнө нь мэдээлсэн.
Коронавирусний цар тахалтай холбоотойгоор бүх шатны сургууль, цэцэрлэгийн үйл ажиллагаагаа цахим хэлбэрт шилжээд нэлээдгүй хугацаа өнгөрч буй. Тиймээс ч оюутан, сурагчид, эцэг эхчүүд сургалтын төлбөрийн асуудлыг хөндөж, цахим орчинд байр сууриа илэрхийлсээр байгаа юм.
Тиймээс ч салбарын яамнаас гаргах төлбөрийн зохицуулалт хийх түр журмыг иргэд чих тавих хүлээж суусан. Гэтэл БШУ-ны сайд Л.Цэдэвсүрэн "Нүглийн нүдийг гурилаар хуурсан" "цэвдэг" журам гаргав. "Өмчийн хэлбэр харгалзахгүй бүх шатны боловсролын байгууллага суралцагчийн сургалтын төлбөрт хөнгөлөлт үзүүлэх, дараагийн төлбөрт шилжүүлэх түр журам"-д
-Сургалтын төлбөрийг эцэг эхчүүдийн санхүүгийн нөхцөл боломжинд суурилан уян хатан нөхцлөөр сар, улирлаар тооцон авах,
-Төлбөрийн хөнгөлөлтийн хэлбэрүүдийг ярилцан эцэг эхийн хөдөлмөр эрхлэлт, орлогын байдлыг харгалзан үзэж, хөнгөлөлт үзүүлэх,
-Теле хичээлээс гадна суралцагчид цахим хичээл, давталга өгсөн тохиолдолд түүнд зарцуулагдсан зардлын тооцоо нь төлбөртэй хэрхэн уялддаг талаар эцэг эхэд мэдээлж, дээрх зорилгоор дахин нэмэлт төлбөр авахгүй байх,
-Оюутны цахим хичээлд хамрагдсан ирц, идэвхи, чадвар, явцын дүн зэргийг харгалзан олон төрөлт хэлбэрээр сургалтын төлбөрийн хөнгөлөлт үзүүлэх зэргийг журамлажээ.
Эдгээр нь ердөө л сургуулиудад давуу байдал олгосон нь илт. Сургуулийн захиргаа сургалцагч нэг бүрийн амжиргааны түвшинг тодорхойлж, сургалтын төлбөрийг харилцан адилгүй тогтоохгүй гэдэг нь хэнд ч ойлгомжтой.
Тэгэхээр сургууль сургалтын төлбөрөө хэд гэж нэхнэ түүнийг л суралцагч төлөх нь. Угтаа сургалтын үйл ажиллагаа танхимаар бус цахимаар хичээллэж байгаа, цар тахлын нөхцөл байдлаас шалтгаалан иргэдийн амьжиргааны түвшин буурсан, төрөөс аж ахуйн нэгжүүдийн ус, цахилгааны төлбөр зэрэгт тодорхой хэмжээний хөнгөлөлт үзүүлж буй зэргийг харгалзан тэдгээрийг журамд тусган, сургалтын төлбөрийг хувиар тооцох, хөнгөлөтийг дорвитой үзүүлэх зэргийг нягт тусгасан бол иргэд талархах байлаа.
Гэсэн ч "Явах хүнээр ачаа бүү татуул" гэгчээр Л.Цэдэвсүрэн сайд суудлаасаа буухаас өмнө ийнхүү "цэвдэг" түр журам гаргаж орхив.
Р.Алтан
