Монгол Улсын Хөгжлийн банк гэж халгиж, цалгисан нэг байгууллага байна. Тиймдээ ч тус банкныхан өгсөн зээлийнхээ араас хөөцөлдөж огт явдаггүй гэдэг. Үүний нэг жишээ бол, Хөтөлийн цемент шохойн үйлдвэрийн удирдлагууд Хөгжлийн банкнаас 2012 оны аравдугаар сарын 19-нд жилийн 8.1 хувийн хүүтэй, 61.265.000 ам.долларын зээл авчээ. Уг зээлийг төлөх хугацаа 2020 онд дууссан ч өнөөдрийг хүртэл  зээлээ төлөөгүйгээр үл барам Хөгжлийн банкныхан ч төл гэж шахахгүйн сайхан боломж болжээ.

Хөтөлийн цемент шохойн үйлдвэрийг 1,3 тэрбумаар хувьчилсан ч  ийнхүү өр төлбөр нь барагдахгүй, дээр нь татвар, нийгмийн даатгалд 20 орчим тэрбумын өртэй аж.

Монгол Улсын Хөгжлийн банкны гүйцэтгэх захирлын үүрэг гүйцэтгэгчээр Г.Амартүвшинг 2019 оны тавдугаар сард томилж байв. Тэрбээр өр төлбөрийг барагдуулахад онцгой  анхаарна хэмээж байсан. Гэвч түүнийг  энэхүү албан тушаалд байхад Хөтөлийн цемент шохойн үйлдвэрийнхний  өрөө төлөх хугацаа хэдийнэ дууссан байсан ч тэрбээр гараа ч хөдөлгөсөнгүй.

Хөгжлийн банк хуйвалдааны банк болсон тухай ярих болсон нь оргүй биш бололтой. Г.Амартүвшин захирал УИХ-ын чуулганы танхимд өдгөө мөр зэрэгцэн суугаа нөхдөдөө 33 тэрбумын зээл гарган өгч, албан тушаалын эрх мэдлээ ашигласан талаарх дуулиан намжаагүй байгаа.

Энэ бүхнээс харахад тэрбээр Хөгжлийн банкны захирлын үүрэг гүйцэтгэгчээр ажиллах богино хугацаандаа чухам ямар ажил амжуулав. Энэ талаарх тайланг шаардах эрх төрд бий.

У.Тэргэл