Нийгмийн даатгалын  шимтгэлийг нэмэгдүүлж буйд МҮЭХ эрс эсэргүүцэж, иргэдийн гарын үсгийг цуглуулж эхэлжээ. Нийгмийн даатгалын үр өгөөжийг сайжруулаагүй байж шимтгэлийг нэмэх нь оновчгүй шийдэл гэдэгтээ ч олон хүн санал нэгдэж байна.

Ялангуяа цар тахлаас үүдэлтэй иргэдийн амьжиргаа муудаж, ажлын байр доголдож, одоо дахин хатуу хөл хорио тогтоовол 500 мянга гаруй хүн ажилгүйчүүдийн эгнээнд шилжихээр болоод байгаа юм.

Үндсэндээ ажил олгогчид ажилтнуудаа авч үлдэхийн тулд санхүүгээ шавхаж дуусчээ. Ийм үед  нийгмийн даатгалын шимтгэлийг нэмэгдүүлж буй нь цагаа олоогүй, ард иргэдээ “басамжилсан” шийдвэр хэмээн эдийн засагчид хэлж байгаа. Харин МҮЭХ энэ долоо хоногтоо Засгийн газар, ЗГХЭГ, Санхүүгийн зохицуулах хороо зэрэг холбогдох газруудад албан шаардлага  хүргүүлсэн байна. Цаашлаад цар тахлын энэ үед иргэдийн амьжиргааг улам дордуулах шийдвэрээ эргэн харахгүй бол хууль журмынхаа дагуу жагсана гэдгээ МҮЭХ илэрхийлж эхлээд байна.

У.Тэргэл